ECI Secretary leh Director in SRI thu-ah Mizoram tlawh

Election Commission of India (ECI)-a Secretary Binod Kumar leh Director Shubhra Saxena-i te chu ni hnih (2) chhung cham turin nimin khan Mizoram an lo thleng a; Planning & Programme Implementation Department Conference Hall-ah Aizawl District-a Election Official-te nen Mizoram-a Special Intensive Revision (SIR) of Electoral Roll kalpui mek hlawhtlinna tura an hmalak dan thlirletna leh hmalak zel dan turte an sawiho nghal a ni.

He sawihona hunah hian Shubhra Saxena-i chuan kalkhawmte hnenah SIR awmzia leh a kalphung te a sawifiah a. SIR chu hna hautak leh fimkhur taka kalpui ngai a nih avangin, India Constitution-in a sawi ang leh Representation of the People Act, 1950-in a ruat angte chu ngun taka zawm turin kalkhawmte chu a ngen a; hei hi vote nei thei zawng zawng te Electoral Roll-a telh vek an nih theih nan leh Vote nei thei lo te chu paihchhuah an nih theih nan a pawimawh thu a sawi a ni. Hei bakah hian Shubhra-i chuan Mizoram chu ramri zau tak nei State a nih avangin dan lova lo lut (illegal migrants) leh dik lo taka thil tih (fraudulent practices) laka venhimna atan Official-te chu fimkhur zawka hma la nasa lehzual turin a fuih bawk a ni.

He hunah Mizoram Chief Electoral Officer (CEO) Garima Gupta-i pawhin thu sawiin, Official-te chu thawhhona tha leh inpum-khatna neiin a tulna apianga che chhuak tur leh BLO-te puih an ngaihna zawna pui zel turin a chah a. Mizoram-a SIR hna kalpui mek chu hlawhtling taka zawh a nih theih nan official-te chu duhsakna a hlan nghal a ni.

Nimin-a thutkhawm hi ECI Director Shubhra Saxena-i’n a kaihruai a, Mizoram CEO, Aizawl District DEO Bawrhsap ni bawk Er. Lalhriatpuia, ERO, AERO, BLO te bakah Election Official dangte an tel a ni.