Drug License 4102 awm mek

Mizoram-ah Drugs License 4102 awm mekin a zatve aia tam chu Aizawl-a awm a ni.

Health Department hnuaia Food & Drug Administration in an chhinchhiahna atanga a lan danin kumin June thla thleng hian Mizoram-ah Drug License 4102 awmin heng zinga 2,218 chu Aizawl-a awm niin a dang 1884 te chu Mizoram hmundang a awm a ni a, Drug License zawng zawng atanga za zela 54.07 chu Aizawl-a awm a ni. Drugs License hi chi thum awmin General Retail License nei 981; Restricted Retail License nei 2,704 leh Wholesale License nei 417 an awm a, General Retail License nei hi Aizawl-ah 764 leh Aizawl pawn lamah 217 awmin Restricted Retail License nei hi Aizawl-ah 1,092 leh Aizawl pawn lamah 1,612 awmin Wholesale License hi Aizawl-ah 362 leh Aizawl pawn lamah 55 a awm bawk a ni.

Food & Drug Administration (FDA) hian ruih nana hmansual theih damdawi zuar thin te lakah pawh hma an la reng a, kum 2025-2026 chhung khan Licence suspended 8 leh Licence cancelled 10 awmin kumin (2026) January atanga June thla chhung khan Licence suspended 4 leh Licence cancelled 2 a awm bawk. Hei bakah hian Pharmacist awm lohna dawr te pawh enfiah thin niin AMC huamchhungah kumin May leh June thla chhung khan Licence 94 endik a ni a; chung zinga 7 chu Pharmacist an neih loh avangin suspend an ni bawk.

FDA hian damdawi quality endikna ah pawh hma lain Mizoram State Drug Testing Laboratory (DTL) hman tur Khawl pawimawh zualpui neih kim loh avangin hmalak a ni bawk a. FDA Officer Drugs Testing lama experience nei Drug Inspector leh Assistant Drug Inspector-te chu DTL-ah attached an ni a. Laboratory equipment leh thildangpawh lei fel tawh niin DTL hman theih hma chuan Regional Drug Testing Laboratory (RDTL), Guwahati-ah sample thawn thin a ni.