Raltlan te Biometric enrolment zofel dawn hnai
Home Department hotute sawi danin Mizoram-a Myanmar atanga raltlan mi 29,727 zinga raltlan mi 29,047 te Biometric Enrolment chu zawh a ni tawh a, hei hi raltlan awm atanga chhutin za zela 97.71 a ni a. District 11 zinga District paruk – Aizawl, Champhai, Lunglei, Mamit, Khawzawl leh Saitual District-te chuan an zofel tawh a. Serchhip District chuan za zela 99.86 an zo tawh a, Kolasib District-in za zela 96.15 zo tawhin Lawngtlai District pawhin za zela 95.83 an zo tawh a ni. Myanmar raltlan awm tam ber palina leh raltlan 3,075 awmna Siaha District-ah chuan za zela 88.62 chauh an la zo a, raltlan 622 chauh awmna Hnahthial District-ah chuan za zela 90.51 an zo tawh bawk a ni.
Bangladesh raltlante Biometric Enrolment pawh zawhfel hnaih a ni tawh a. Zirtawpni thleng khan Bangladesh atanga Mizoram-a raltlan mi 1,482 zinga 1,447 te Biometric Data chu khawn a ni tawh a, za zela 97.64 a tling tawh a ni. Bangladesh-a Chittagong Hill Tracts atanga raltlan lo lut awm tamna ber Lawngtlai District-a awm mi 1,164 zinga mi 1,129 te Biometric Enrolment tih tawh a ni a, hei hi za zela 96.99 niin zawhfel thuai beisei a ni. Bangladesh raltlante hi Serchhip District-ah 235, Lunglei District-ah 75 leh Aizawl District-ah 7 an awm ve a, anni ho Biometric Enrolment hi tihfel a nihna a rei tawh a. Lawngtlai District hi Myanmar raltlan awm tam berna dawttu a nih avangin hna a chak lo a ni.