Chief Secretary in Aizawl-ah Free UPSC Coaching a hawng

Mizoram Youth Commission (MYC) leh Delhi a Drishti IAS te thawhhona-a buatsaih, man chawi awm lova zirlai 100 te tana UPSC Coaching Class buatsaih chu nimin khan Chief Secretary Khili Ram Meena chuan Aizawl-a MYC Auditorium-ah a hawng a, Chief Secretary chuan Mizo thalai zinga UPSC Exam a hlawhtling an awm lohna a rei tawh chu sawrkar laipui Home Minister-in a ngaimawh hle tih sawiin, kaihhruaina tha an dawn a, hlawhtling an awm thuai theih nan he Free UPSC Coaching hi buatsaih a nih thu a sawi a. Finance Department in sum leh pai tul te tumin, tul dang a awm pawhin amah in a ngaihtuah zel dawn thu leh zirlaite chuan hlawhtlinna hmanga chhang let ve ngei tura a beisei thu a sawi bawk. He hunah hian MYC Chairman Malsawmzuala Ralte pawhin Coaching Class kal mekte chu an mamawh zawng zawng sawrkarin a pe tih sawiin, an tih ve tur - taimak, thawhrim leh tumruhna hmanga Mizoram sawrkar leh mipuite beiseina tihlawhtling turin a fuih bawk.