BJP ten Samvidhan Hatya Diwas an hmang

BJP Mizoram State President Dr. K. Beichhua chuan India ram danpui palzut ni champha, Samvidhan Hatya Diwas chu democracy ram ropui India ram history-ah chuan hun tha lo tak, hun duhawm lo hriatrengna a nih thu a sawi.

June ni 25, 1975-a Indira Gandhi rorelna hnuaiah National Emergency puan a nih champha, nimin June 25 kha India ram danpui palzut ni champha, Samvidhan Hatya Diwas-ah hman niin hemi pual hian Aizawl-a BJP Office, Mipui Run-ah hun hman a ni a, BJP President Dr. K. Beichhua India ram Danpui palzutna chu India ramah thleng tawh lo se tih chu a duhdan a nih thu a sawi a. An party chuan an lak thutak thu sawiin, kumtin he ni hi 'Black Day' anga hmangin urhsun taka an hman thin thu a sawi a. India ram chu democracy ram ropui tak, hnam hrang hrang leh chi hrang hrang Culture leh Tradition te pawh hrang hrang awmna a nih thu sawiin, fimkhur taka political party zawng zawngte pawhin ram an kaihhruaia a tul thu a sawi a ni. 

June ni 25, 1975-a Indira Gandhi rorelna hnuaiah National Emergency puan hian khua leh tui te dikna chanvo Fundamental Rights tihtawp a ni a, he ni hi India danpui tihhlumna ni - Constitution Murder Day tih hiala sawi thin a ni a. Nimin-a Samvidhan Hatya Diwas puala hun hmana thusawitu Dr. Zonuntluanga chuan National Emergency hi a hunlaia Prime Minister Indira Gandhi-i thurawn anga puan a nih avangin India Democracy leh Constitution laka direct attack anga ngaih a nih thu leh 1975-a National Emergency puan hi Mizoram thlengin kan tuar tih a sawi a, “Thla 21 zet he Emergency puan avanga kan tawrhna te kha mi tam tak chuan an la hre reng awm e,” tiin rampum-ah mi 1774-in nunna an chan phah thu a sawi bawk.