Assam Regiment dinchampha vawi 85-na lawm a ni

Assam Regiment te chuan nimin khan Aizawl Vanapa Hall-ah an dinchampha vawi 85-na an lawm a, he ni denchhen hian nimin zing khan Aizawl-a War Memorial-ah ram tana nun hlante hriatreng nan pangpar an dah a, hemi hnu hian Vanapa Hall-ah hun hmangin Assam Rifles DIG, Brig. Pushpender Sorayan chuan khuallian nia hmanpuiin Lt. Col. Lalhmingthanga MLA chuan khual zahawm niin a hmanpui bawk.

He hunah hian Brig. Pushpender Sorayan chuan Assam Regiment te chu duhsakna hlanin, mipuite rawng an bawlna ah theihtawp chhuah zel turin a chah a. Ram tana nunna hlante zahna chibai bukin, tuna Sipai ni lai mek te chu an hmingthat tawhna te chhawmnung zel a, ram hming titha zual tura thawk turin a sawm bawk. 

He hunah hian Khual zahawm, Mizoram Ex Servicemen League President leh MLA Lt. Col. Clement Lalhmingthanga pawhin Mizoram mipuite thinlungah Assam Regiment chuan hmun a luah thuk hle tih sawiin, tunah chuan Assam Rifles bakah Lunglei, Champhai leh Khawzawl-ah te Territorial Army company-te a lo awm ta chu Mizoram tana hmasawnna pawimawh tak a nih thu a sawi bawk.