April 2024 hnuah Mizoram-ah Zu kaihhnawih vanga thi mi 325 an awm tawh

Kum 2024 April thla atanga June ni 12,2026 thleng khan Mizoram-ah Zu kaihhnawih vanga thi 325 an awm tawh a. Zu chhia in vanga thi mi 56 chhinchhiah ni tawh bawkin chhinchhiah chinah Mizoram-a Zu vanga thi mi 381 an awm tawh a ni.

Excise & Narcotics Department chhinchhiah danin kum 2024 April thla atanga kumin Junw 12 thlenga Mizoram-a Zu kaihhnawih vanga thi te hi mipa 279 leh hmeichhia 46, an vaiin mi 325 an ni a, Mizoram District hrang hrang zingah Kolasib District-ah zu kaihhnawih vanga thi hi tam berin mi 142 an awm a, mi 70 thi awmna Champhai District leh mi 57 awmna Serchhip District ten an dawt a, Aizawl District chu palina niin thi mi 33 an awm a. Hetihlai hian Hnahthial leh Saitual District-ah chuan Zu vanga thi an awm lo nia chhinchhiah a ni.

Chhinchhiahna atanga a lan danin Mizoram-ah Zu kaihhnawih vanga thihna hi nikum 2025 khan thleng tam berin tum 94 a thleng a, hemi kum-a thi zinga mi 81 chu mipa niin hmeichhia Zu vanga thi 13 an awm bawk a. Kumin ah hian Zu vanga thi chhinchhiah mi 18 an awm tawh a, heng zinga 16 hi mipa niin hmeichhia 2 an ni. Kumin chhunga Zu kaihhnawiha thi te hi Lunglei District-ah 4, Champhai-ah 8, Kolasib-ah 4 leh Khawzawl District-ah 2 te an ni. Kum 2019, 2020, 2021 leh kum 2022-ah te zu vanga thi chhinchhiah an awm lo a, tunhnai kum thum chhunga zu vanga thi hi kum 2023-ah 56, kum 2024-ah 66 leh kum 2025-ah mi 94 te an ni.

Hetihlai hian kum 1997 atang khan Mizoram-ah Zu chhia (Spurious liquor) in vanga thi mi 56 an awm tawh niin Excise & Narcotics Department chuan an chhinchhiah bawk a, heng zinga 49 hi mipa niin hmeichhia 7 an awm bawk a. Zu chhia in vanga thi te zinga 36 hi Methylated Spirit vang a ni a, mi 6 chu BEDC in leh midang 2 chu Pethidine in vang niin a dang 12 hi an Zu in te chiang taka hriat a ni lo thung. Zu chhia in vanga kum khata thih tam ber kum chu 2001 kha niin hemi kum hian zu chhia in vangin mi 14 an boral nia chhinchhiah a ni.

Zu chhia in vanga thihna thleng chhinchhiah hnuhnung ber chu kum 2022 kha niin hemi kum hian mi pakhat a thi a, a hnuah zu chhia in vanga thi chhinchhiah an la awm lo.