ALIMCO kaltlangin Serchhip-a bungraw hrang hrang sem a ni

Artificial Limbs Manufacturing Corporation of India (ALIMCO) bultumin nimin khan Serchhip DC Pisapui Hall-ah mihring mamawh bungrua chi hrang hrang semna neih niin he hun hi Chief Minister Lalduhoma chuan khuallian niin a telpui a ni.
Pianphunga rualbanlo te, ramtuileilo leh kum upa, an chetvelna atana hmanraw mamawh te hnena bungraw semna hunah hian Chief Minister Lalduhoma chuan kan duhthlanna vang ni lovin, kan pianpui tisa lama kim lohna emaw, harsatna kan nei thei a, fuke kim biaia kan pian hnu pawhin engemaw vanduaina avangin kan taksa ah kim lo leh fel lo a awm theih bakah kan kum a lo tam tak avangin hmanrua engemaw nena kan nun a tul chang a awm thei bawk tih sawiin, chutiang kara kan awm chuan kan harsatna min sutkian sak thei hmanrua kha an lo pawimawh hle thin tih a sawi a. Chutiang mite mamawh hmanraw siamtu turin sawrkar laipui chuan kum 1972 khan ALIMCO hi a din thu leh Mizoram-ah pawh Office rawn hawngin tha takin hma an lak thu a sawi a. “Vawiin-ah Serchhip District khaw hrang hranga miten an zar kan zo ta a. An thil semte hi a mamawhtute tan a hlut em avangin Mizoram pum tuamchhuakin hma la thei se ka duh hle a. DC zawng zawng ten lo ngaihven se a thain ka hria,” a ti.

Nimin-a heng bungrua semna hunah hian Serchhip District chhunga Disabled Person mi 28 leh kum lama upa mi 183, an vaiin mi 211 hnenah hmanraw chi hrang hrang 1,427 zet an sem chhuak a. An hmanraw pek chhuah hlut zawng hi cheng nuai 19.25 hu a ni.