Aizawl Sahuan-a Sakei damlo hlawhtling takin enkawl
Aizawl Zoological Park Director Margaret Lalramchhani chuan June ni 15 khan Sahuan-a Sakei enkawltu, Animal Feeder chuan Bengal Tiger nu pakhat chu dan pangngai aia chaw a ei tlem avangin harsatna a neih a rin thu a sawi a, Range Officer leh Biologist nen ngun taka Sakei taksa hi an enfiah hnuah a mei chung zawnah hliam lian vak lo an hmu a, Sakei hi a kawlh em avangin a hliam enchiang tur hian Mizoram Vety Department atanga mithiamte leh Sahuan Veterinary Field Assistant (VFA) te an pun a, a hliam chu a lung tih an hmu a. A hliam hi eng anga thuk nge tih hre turin Selesih Vety College atangin a kah mutna an hawh a, June ni 18 khan kah mut tum mah se an damdawi neih chu a chak tawk loh avangin an kap mu zo lova, muhil chiah lo mutchhuak deuha a awm laiin a hliama lung awm te chu tihfai sakin, damdawi in an kap a, a chaw ei turah damdawi an telh bawk a ni.
Doctor te chuan chawlhkar chhunga an lo enkawl tawhna chuan a hliam chu a lo tidam huai hman tawh tih sawiin, a lo inhaina lamah a ke tin pakhat a ti bung a, chu chuan hnai a lo la a. A theih ang angin an dressing a, Long Acting antibiotic chak chi in an chiu bawk a ni.
Margaret Lalramchhani chuan Mizoram-a ran damdawi neih te a chak tawk loh avang leh ramsa enkawl thiam an awm mai loh avangin Sakei hliam chu eng ang taka thuk nge a nih tih hre turin Wildlife Institute of India (WII) puihna an dil a, tun thla ni 24 khan WII chuan Mizoram-ah Wildlife Doctor pahnih- Dr. Lallianpuii Kawlni, Scientist D leh Dr. Sanath Krishna Muliya, Scientist C an rawn tir a, an pahnih kaihhruaina hnuaiah Ningani zing khan Sakei chu kap muhilin, State Veterinary Department leh Forest Department atangin Dr. Jonathan, Dr. Lalchhanhima leh Dr. Joan RC Lalremruati te bakah Aizawl Zoological Park Director Margaret Lalramchhani, DFO (Extension) Lalruatfela, Range Officer Zohmingsanga leh Sahuana thawkte nen minute 45 chhungin fimkhur leh uluk takin enkawl ngai awm ang ang te hlawhtling takin an ti fel a. Tun dinhmunah Sakei hian hma a sawn a, a hmaa a thinchhiat ang em em in a thinchhe tawh lo nia an hriat thu a sawi a ni.
Mizoram-a Sahuan awmchhun, Aizawl Zoological Park-ah hian ramsa 315 awm mekin Bengal Tiger pathum, nu pahnih leh a pa pakhat a awm a. Tuna Sakei nu hliam an enkawl hi kum 9 a upa niin, Nandan-kanan Zoological Park, Odisha atangin kum 2023 khan Mizoram-ah lakluh a ni.