World Class Tourist destination sawihona neih a ni

India ram chhunga State leh Union Territory tina khawvel hmundangte el phak khualzinte tlawh duhna hmun (tourist destination) pakhat tal neih tura Sawrkar laipuiin a rel angin Mizoram tana hmalak dan tur sawihona chu nimin khan neih a ni.

Tourism Department huaihawta Economics & Statistics Department Conference Hall-a State Level Consultative Workshop on 'Developing Global Standard Tourist Destinations' neih hi Tourism Ministet Lalnghinglova Hmar chuan hmanpuiin Mizoram-ah hian Tourism hian potential nasa tak a neih thu leh Tourist-te hnenah Mizorama hmun tlawh tur hrang hrangte, tlawh hun tha ber leh tlawh chhan turte dik taka hrilh an ngaih thu a sawi a; hemi atana Tourism Department-in Mizoram Tourism Calendar an siam chu fakin, Tourism hian khualzinte tlawh hmun chauh ni lovin, a chhehvela hmundang te leh mite thlengin hlawkna a pe tih a sawi. Hei vang hian he sector-ah hian Sawrkar hnathawk ni lo midang ruat (outsourcing) leh khawtlang mipuite (community) nena tantlan a pawimawh thu a sawi bawk.

He hunah hian Mizoram sawrkar-a Commissioner & Secretary to CM Vanlaldina Fanai pawhin Mizoram chu khualzinte hip thei hmun danglam leh mawi tak ni mah se tun thlengin 'hlu si, tlawh tlem' 'High value, low footfall' Sector a la nih thu a sawi bawk.

Tourism Department Addl. Secretary Irene Zohlimpuii Chongthu chuan he hunah hian inlawmna thu sawiin, Sawrkar laipui chuan India ram chhunga State leh Union Territory tinah 'World-Class Tourist destination' pakhat theuh tal neih tir a tum thu a sawi a. Chumi atana hma an lak tawhna te tarlangin, an hmachhawp te a sawi bawk a. Tourist Officer R. Lalrinchhani chuan PowerPoint Presentation hmangin World-Class Tourist destination ni tura thil tulte sawifiahin hemi hnu hian kalkhawmte chuan an ngaihdan leh rawtna te an sawiho bawk a ni.