Chhingchhip-a MIFCO hmalakna hrang hrang MJA-in a hmunah tlawhin thawktute nen an kawm

Mizoram Food & Allied Industries Corporation (MIFCO)-in Chhingchhip dai-a Thei leh thlai sawngbawlna an kalpuina hmun chu nimin khan MJA Serchhip District Member te chuan a hmunah tlawhin MIFCO Chairman Lalthazuala Rawite chuan MJA member-te hi an hmalakna hrang hrang leh hmachhawp an neih te a lo hrilhfiah a ni.
Nimin-a MIFCO hmun tlawhtute hnenah hian MIFCO Chairman chuan Chhingchhip-a an hmunhma ah hian sawrkar hmasa te pawhin hmalakna an lo neih tawh thu sawiin, heng hma an lo lak tawhna hmang hian awlsam zawka ke an pen theih thu leh nikum lamah Theitui sawr hna te pawh an lo kalpui tawh thu a sawi a. Kumin hian Thlai pali- Lakhuihthei, Sapthei, Mautuai/Rawtuai leh Baibing te sawngbawl kawngah hmalak an tum thu sawiin, heng bakah hian Sairang-a MIFCO hmunah Mineral Water siamna tur khawl bun tawh chu hmang tangkaia a taka hnathawhtir an tum thu a sawi a, Aizawl Bung Bangla-a Sa sawngbawlna hmun tur lo siam tawh sa pawh tuai tharin hman tangkai chhoh mek a nih thu a sawi a, Chhingchhip-a an hmunhmaah hian Petrol Pump din tuma hmalak mek a nih thu a sawi bawk a. Kumin ah Lakhuihthei chu kg khat Rs.18/-in Chhingchhip-a an hmunah an lei dawn thu leh Sapthei chu kg khat Rs. 45/-in an lei dawn tih a sawi a, hei aia to-a a thartu ten an hralh thei a nih chuan a lawmawm ah an ngaih tur thu leh an thlai phurhchhuahna tur kawng te siamtha tura hma an lakna te a sawi a. Hetihlai hian Mautuai/Rawtuai leh Baibing te chu a rate an la bithliah thei rih lo tih a sawi a, a thar hunah Bazar rate-te enmil chungin a rate chu an la siam dawn tih a sawi bawk.

Heng bakah hian MIFCO khawl hlui leh bungrua/buiding an siamthat leh an thawm-that hrang hrangte sawiin, sum lakluh theihna tur hrang hrangte an dap reng tih a sawi a, Loneitute tana ding an nih ang ngeiin thlai leh thei sawng-bawlna lam chu an ngaih pawimawh ber thu a sawi a, an hmunhma tlawh tawhtu Chief Minister leh Minister dangte pawhin an hmalakna an phurpui avangin lawmthu a sawi bawk.

MJA Member te hian MIFCO hmun-hma leh khawl hrang hrangte an thlir a, MIFCO hmalakna hrang hrang an hmuhin mipuite tan MIFCO chu tuai thar leh a ni dawna a lan avangin lawmawm a tih thu sawiin, MIFCO in man chawia mikhual thlenna tur hmun an tuaithar chu MJA President, Kapliana Pachuau chuan a hawng nghal bawk.