Tourism Director inhnukdawk

Mizoram sawrkar in Tourism Director tura a ruat R. Lalrodingi chuan nimin khan Chief Minister Lalduhoma hnenah he hna chelh tura ruat a nihna atanga a inhnuhdawh thu a thlen.

Mizoram sawrkar in Mizoram Tourism Director charge la tura a ruat R. Lalrodingi hian nimin khan Chief Minister Lalduhoma hnenah lehkha thehlutin Tourism Sector hmasawnna kal mek a thuanawp lohna turin Tourism Department Director post chelh tir a nih chungchangah MZP-in nasa taka an dodal tak si avangin ni thum (3) lai Office hna kal thei thei lova an awm tak thu leh hna ti thuanawptu leh a (Chief Minister) sawrkar pawhin duhsak uchuak nei anga lang thei tura a lo awm reng chu a dik theia a hriat loh thu a tarlang a. Hei vang hian Director Tourism hna atang hian lasawn mai tura ngenin, “Tunah erawh chuan dodalna nasa tak a awm avangin ka in resign thu ka rawn hriattir che a ni,” a ti a. Director Tourism hna chu Departmental Officer post a nihna erawh humhim theih hram dan awm sela tih erawh a ngen thu a tarlang tel bawk a ni.

Nimin vek khan MZP General Hqrs. chuan thuchhuah siam nghalin DP&AR (Civil Service Wing) in May 22, 2026-a Mizoram Tourism Director charge la tura R. Lalrodingi a ruatna order chhuah nawn chungchangah Mizoram sawrkarin chu Order hi a sut ngei theih nan May ni 25-27, 2026 chhungin Tourism Department Pisa kai tur hlawhtling taka dan an nih thu an sawi a. Nimin chawhnu lama hmalak zel dan tur ngaihtuah tura thutkhawm an koh laiin R. Lalrodingi hi Tourism Department Director post atanga a inhnuhdawh tak avang leh sawrkarin a pawm avangin Meeting thulh nghal a nih thu an tarlang a. Pensioner rawih nawn (Re-Employment) emaw, Service Extension emaw chuan thalai tam tak hna zawng mek te a dal thin avangin hetiang System hi tha an ti ngai dawn lo tih an sawi bawk.