Thla dang aia Electric Bill tam theih chhan sawifiah

Smart Meter hman a nih hnua Electric Bill hmasa berah Bill lak hun chhung insiamrem nan a rei bik avangin thla dang aiin pawisa chawi a danglam phah ta deuh niin Power & Electricity Department hotute chuan an sawi.

Akashvani News Aizawl zawhna chhangin P&E Department-a EE, Lalhriatpuia chuan Mizoram pumah Smart Meter hmang turin beihpui thlak mek a ni a, tun dinhmunah Aizawl khawpuiah hna thawh mek niin - Revenue Sub-Division I leh Division II hnuaiah mi 49,540 bawr vel tan Smart Meter an vuah tawh a, Aizawl-a an zawh hunah District dangah an thawk chhunzawm dawn a ni. Electric Bill chungchanga harsatna nei tan mahni Bialtu Sub-Division-ah complain theih a ni tih sawiin, an sawiselna a dik ngei a nih chuan hma an laksak thin tih a sawi bawk.

Smart Meter vuah kal lai mekah Department hotute chuan, meter vuah hmabak te chu an Electric Bill hlui lo kawl tha emaw, an Consumer number lo hrechiang turin emaw an ngen a, hei hian hnathawh kawngah dik leh tha zawkin a pui thei dawn niin an sawi a. P&E Department hian Mobile Application (PEDM Consumer) an nei a, hemi App atang hian mahni bill pek tawh dan leh hriattur pawimawh hrang hrang hriat theih a ni a, Department lam chuan mipui a tam thei ang berin Playstore atanga download in lo hmang thei se an duh thu an sawi bawk a ni.