Serchhip District-a SIR 2026 kalpui tura thawktute tan Serchhip-ah Training neih a ni
Serchhip Bawrhsap Pisapui Hall leh DC Meeting Hall-a Booth Level Officer (BLO)n Additional BLO leh Supervisor-te puala Special Intensive Revision, 2026 chungchang zirhona hi Serchhip-a Election Officer Lalchhanhimi chuan kaihruaiin he hun hmanpuitu District Election Officer Paul L. Khuma chuan SIR 2026 kalpui tur chungchang tlangpui sawifiahin, he hmalakna ah hian mipuite’n vote an neih zelna turah BLO, Additional BLO leh Supervisor-te chu an mawhphurhna a sang dawn hle tih sawiin, an hnathawh turah theihtawp chhuah turin a chah a ni.
Serchhip District-ah hian Assembly Constituency pathum (3); 26-Serchhip (ST) AC, 27- Tuikum (ST) AC leh 28-Hrangturzo (ST) AC te awmin hemi huamchhungah hian Booth Level Officer (BLO) 88 awmin Additional BLO 29 leh Supervisors 11 an awm a, heng mite tana nimin-a SIR 2026 chungchang zirhona hunah hian District Level Master Trainer & Assistant Electoral Registration Officer (AERO) Vanthangpuia SDC leh Serchhip RD Block-a BDO Lalramdintluanga ten zirtirna an pe a ni.
Training-ah hian Special Intensive Revision, 2026 kalpui dan tur te, BLO App hman dan turte, BLO-te’n inziahluhna (Enumeration form) online-a an upload dan tur te, huntiam chhunga upload hman lohte chu Draft Roll atanga paih an nih tur thu te, hemi hun chhunga Form submit ve lo te chuan a hranpaa form lachhuak a, dilna hranpa an siam a ngaih tawh tur thu te, chutih hunah chuan document tam tak phut a nih tawh dawn avangin Voter's ID nei tawh sa te’n document thil tel ngai lova Enumeration Form-a an inziahluh mai theih hun chhung, May ni 30 atanga June ni 28 chhung hian tan lak nasat a tul thu leh tih dan tur hrang hrangte inzirtirna neih a ni.
Special Intensive Revision, 2026-ah hian Vote nei sa leh Voter's ID nei tawh sa te pawhin Enumeration Form hi an fill-up that leh vek a ngai dawn a; BLO-te'n In tinah kalin Form hi an semchhuakin, an lakhawm leh vek anga, dahkhah dan thiamlo te an pui bawk ang. Huntiam chhunga Form dahkhat lo emaw, thehlut lo emaw-te chu Draft Electoral Roll atanga paih an nih dawn a ni.
Tun tuma Electoral Roll siam thar ah hian Kumin July ni 1-a kum 18 tling chin te thun theih an ni dawn a, July 5, 2026 khian Draft Electoral Roll chu tarchhuah tur a ni ang.
Comments
Post a Comment
I ngaihdan i sawi hian mipui ngaihdan i tarlang a ni!