Carbon Dating hmanga an thil zirchhuah te puang

Art & Culture Department hmalaknaa Cham-phai District chhung Dungtlang khaw bula hmunhlui zirchianna atanga carbon sample an lakchhuah zirchianna a an thil hmuhchhuah chu nimin khan Art & Culture Minister C. Lalsawivunga chuan a Pisa-ah a pung.

He hunah hian Art & Culture Minister chuan North Eastern Council atangin Art &Culture Department chuan he zirchianna kalpuina tur sum hi dawngin, Department of History, Higher and Technical Institute, Mizoram (HATIM) nen tangkawpin kum 2024 May thla atang khan zirchianna leh Archaeological Excavation kalpui tan thu a sawi a, Carbon Sample an lakchhuah te chu Beta Analytic, Florida, USA-ah test a ni a. He zirchianna atanga a lan danin tum li (4) lai Dungtlang khaw hmunhlui-ah mihring an lo cheng tawh tih a hriat theih a. Mihring lo awm tawhna kum te hi 410-1830 A.D. inkar a ni a. Heng kum te hi Carbon Dating hmanga chhut chhuah an ni.

Tianhrang thlan atangin ruhro pawh laihchhuah a lo ni tawh bawk a. Beta Analytic, Florida, USA atang tho in kum 1740-1800AD hunlai a mi a ni tih lo nemngheh a ni tawh bawk a. Dungtlang hmunhlui hi kum inchhangbung zatin an luah lo tih a hriat theih a, luah loh kum kar awl pawh kum engemaw chen a awm a ni. Testing dang kalpui mek niin, chanchin kimchang zawk hriat theih thuai beisei a ni.

He project buaipuitute hi Archaeologist pahnih Vanlalhuma Singson (Art & Culture Dept.) leh Dr. Lalhminghlua, Asst. Prof. (Dept. of History, HATIM) te an ni a. Nimin-a hun hman ah hian anni bakah Art & Culture Department official te leh Dungtlang khaw mi leh sa te an tel a. Art & Culture Minister C. Lalsawivunga chuan Mizo hnam rohlu leh hmun hluite Art & Culture Department lamah report nachang hre tur leh tichhe lo leh venghim turin Mizoram mipuite a sawm a ni.