Sawrkar in inrenchem kalpuina tur a puang ta; Lirthei hman titlem turin kawng hrang hranga hmalak a ni dawn

Mizoram sawrkar chuan West Asia buaina avanga khawvel huapa Petrol leh Diesel man a san tak zel avangin sum leh hmanraw renchemna tur hmalakna thar a puang.
Hemi chungchang ah hian Mizoram sawrkar General Administration Department (GAD) chuan tunkar Thawhlehni khan thuchhuah siamin hmalakna tur pawimawh zual te a tarlan zingah Sawrkar Department tinah hnathawktu zaa 20 chu In lama hna thawk tura ruahman an ni a, hei hian damdawi In, Tui, Kawlphetha, Disaster Response, Lirthei leh Law and Order kaihhnawih ah hnathawkte a huam lova, Aizawl khawpui chhunga Traffic Jam leh Petrol hman tlem nan Office kal hun tih danglam a ni bawk. He inrenchemna tura State sawrkarin hmalakna tur a duanah chuan sawrkar hnathawkte chu Group hnih-ah thenin Group khatna in a a huam zinga Department hrang hrang 20 te chu zing dar 8:30 atanga tlai dar 4:30 thleng Office kal hun bi a tuk sak a, Group hnihna in a huam Department dang 20 chu zing dar 10:30 atanga tlai dar 6:30 thleng Office kal hun bi a tuk sak bawk a ni.

Hei bakah hian kar tin Nilaini chu sawrkar lirthei hman loh ni, 'No Official Vehicle Day' atana puan a ni a, Officer leh Staff-te chu ke-a kal emaw, vantlang lirthei hmang turin an infuih bawk a. Sawrkar Meeting-te chu tuialhthei renchem nan a hmuna kal kher lova Video Conferencing hmanga neih hram tur a ni a. Official-a zin chhuahna pawh a tul tawpkhawk-ah lo chuan tih loh tur a ni an ti bawk. 

Chief Minister, Minister leh hotu dangte lirthei zui zat chu mahni duhthlanna ngeiin tih tlem tur a ni a, State sawrkar hnathawk leh sawrkar hnuaia thawk dang te chu Foreign-a zin lo tura tih an ni a. Sawrkar Office-ah Light leh fan-te uluk taka hmeh mih (off) tur a ni a, AC pawh hman tlem tur a ni a, Sawrkar building cheina-a light hman pawh khap a ni bawk. Sawrkar hun hman hrang hrang a Reception leh Hospitality-a sum hman thinte chu tlem thei ber tura ruahman a ni a, heng hmalakna te hi thuchhuah siam ni, May 19, 2026 atanga hman nghal tur a nih thu leh thuchhuah dang a awm hma chu hman tur a nih thu an tarlang bawk a ni.

India ram chuan a Crude Oil hman za a 85 chu ram pawn atanga a lak luh a nih avangin West Asia-a buaina avanga harsatna thleng hian India ram a nghawng nat hma hian hetiang inrenchemna hi Mizoram sawrkar chuan a siam tan niin sawrkar thuchhuah chuan a sawi a ni.