Revenue Department in hma an la mek tih sawi

Land Revenue & Settlement (LR&S) Department changtu Minister B. Lalchhanzova chuan Revenue Administration changtlung leh tha neih chhoh zel tumin Mizoram sawrkar chuan tan a la chho mek tih a sawi.

Nimin khan Aizawl-a I&PR Conference Hall-ah thuthar thehdarhtute kawmin LR&S Minister B. Lalchhanzova chuan an Department hmalakna hrang hrang a sawilang a. Mizoram Sawrkar chuan Revenue Administration changtlung leh tha neih chhoh zel tumin tan a la chho mek tih sawiin, “Revenue Administration hi thil harsa leh kentel ngah tak a nih avangin awlsam taka siam fel zung zung a harsa hle a. Thil tam tak chinfel a, remfel hmasak a ngai a ni,” tiin chutiang tur chuan a Dan lam, Legislative Framework-ah te, Sawrkar chhung inrelbawlna, Administrative Framework lam leh Mipuite hnena Service kalpuina, Citizen Services lamte uluk taka ruahman chhoh a tul thu a sawi a. “Tunah hian hmalakna engemawzat kan kalpui ve tawh a, hmalak chhunzawm tur pawh kan chhawp chho nual tawh,” a ti a ni.

Revenue Minister chuan ruahmanna eng pawh a taka chang a, mipuite tana awlsam zawka Service kalpui thei tur chuan thil tih ngai leh siam fel ngai a tam viau thu pawh sawiin, “Sawrkarin a ruahman ang leh duh ang hian thil a thleng zung zung thei lo lai hi a awm thin a, mipuite hriatthiamna pawh kan ngen a ni. Zawi zawiin a tha zawngin hma kan sawn chho zel anga, mipuite tana awlsam zawk, chak zawk leh dawr nuam zawka service pek chhoh zel kan tum a ni,” a ti a. Revenue Department chu Sawrkar tana sum thawkchhuaktu Department an nih angin, State Sawrkar tana State’s Own Tax leh Non-Tax Revenues-te a theih anga thawhchhuah zel pawh an tum thu a sawi bawk.

Minister chuan The Mizoram Land Revenue Act, 2013 chu August 2025 khan amendment pawimawh tak tak siam a nih thu te; The Mizoram Prevention of Land Encroachment Act, 2026 chu awmze nei leh chak zawka hman a nih theih nan March, 2026 khan Mizoram Assembly-in a pawmpui thu te; The Mizoram Survey and Settlement Operations Act, 2026 pawh buatsaihin Assembly Fur thutkhawm ah pass hman tura beisei a nih thu te; The Mizoram Land Revenue Act, 2013 kan hman lai chu hun inher danglam zel avangin tih danglam tulna tam tak a lo awm tak avangin dan thar, The Mizoram Land Revenue Act, 2026 chu buatsaih mek a nih thu leh Apartment Ownership Act pawh duangin Revenue Court Manual pawh siam mek a nih thu te a sawi bawk a. Tunah hian LR&S hnuaiah hian Post awm zawng zawng 518 awmah a chanve 259 fill up niin a chanve 259 a ruak mek tih sawiin, Surveyor 14 lak belh an nih tawh thu leh Surveyor 30 dang lak belh leh tum a nih thu sawiin, UDC 2, LDC 5, LDC (PE) 4 leh Group D (PE) 2 lak belh an nih tawh thu a sawi bawk.