RD&AD Minister-in PAI 2.0 Report Card a tlangzarh

Rural Development & Administration Department (RD&AD) changtu Minister Prof. Lal-nilawma chuan nimin khan ‘Panchayat Advancement Index (PAI) 2.0 Report card’ a tlangzarh.

Directorate of Local Administration Conference Hall-a hemi puala hun hman ah hian Minister chuan (LAD hmalakna thar Panchayat Advancement Index (PAI) 2.0 chu tangkai a tihzia leh kumin a PAI 2.0 Report Card tlangzarh a ni chu lawmawm a tih thu a sawi a. PAI Indicator hrang hrangte chu khawtlang hmasawnna atan an pawimawh hle dawn tih sawiin, Village Council (VC) te chu khawtlang hmasawnna tura kaihruaitu pawimawh tak an nih angin, PAI kaltlanga data lakhawmtu mawhphurhna lian tak an neih thu a sawi bawk a ni.

He hunah hian LAD Director Dr. Lalngura Tlau chuan Panchayat Advancement Index hi sawifiahin, Localisation of SDGs (LSDGs) thupui (theme) 9 kaltlangin VC hrang hrangte hmasawnna chu PAI hmang hian a hmuh theih a ni tih a sawi a. nikum-ah PAI 1.0 Report chu tlangzarh a lo ni tawh thu a sawi a, kumin ah PAI 2.0 tlangzarh leh niin, nakum lamah chuan Financial Year (FY) 2025-26 base-in PAI 3.0 kalpui leh tur a nih thu a sawi a ni. PAI 2.0 hian FY 2023-24 baseline-ah hmangin, PAI 1.0 chuan FY 2022-23 base-ah a hmang a. PAI 1.0-ah indicator 516 leh data point 794 zet mai a awm laiin, PAI 2.0-ah chuan hna tihawlsam nan za zela 71 (71% reduction) zeta tihhniam a ni a; indicator 150 leh data point 230 chauh neih a nih tak avangin data lakkhawm a awlsam phah hle a ni, a ti bawk.

PAI Score (composite scores) atang hian khaw hrang hrang VC-te chu an hnathawh that dan a zirin hmun nga-ah then an ni a, mark 90 aia tam hmu, 'Achievers' (A+ Grade) VC-te hnenah sawrkarin lawmpuina a hlan dawn a ni.