Mizoram-a lirthei 2284-ah Vehicle Location Tracking System (VLTS) vuah a ni tawh

Hmeichhia leh naupangte himna atana mi phur chi lirthei zawng zawnga vuah vek tura tih Vehicle Location Tracking & Emergency Alert System (VLTS) chu Mizoram chhunga lirthei 2284-ah vuah a ni tawh.

Transport thawktute sawi danin VLTS khawl hi lirthei passenger phur chi motor reng reng Taxi, Maxi Cab, Bus leh Rental-ah te vuah vek tur a ni a, heng lirthei lei thar hnenah chuan vuah nghal zel a niin lirthei hlui tawh deuhah erawh vuah turin a man a to deuh avangin harsatna an tawk tih an sawi a. Mipui vantlang chuanna chi lirtheia VLTS khawl vuah lo leh tinung lo chuan motor registration a tih theih tawh dawn loh a, permit renew pawh a theih tawh dawn loh niin an sawi bawk. VLTS khawl hi lirthei khalhtu leh a chuang inkarah dah thin a niin hmeichhia leh naupang harsatna tawk an awm chuan an hmet a, VLTS device hi Command & Control Center-ah thlengin Emergency Response Support System-ah hriattir leh thin an ni a. ERSS Duty te hian Police Station hnai berah hma la turin an hriattir chhawng ve leh thin a ni. VLTS atang hian puih dilna 'emergency alert' hi Mizoram-ah tum 1,53,726 dawn a ni tawh a, mahse heng zingah hian han umzui ngai lian tham a la awm lo a. A tlangpuiin lo hmet palh emaw, kut hlei vanga lo hmet an ni tih an sawi bawk.

VLTS hi sawrkar laipui Ministry of Road Transport and Highways in October 25, 2018 a order a chhuah zulzui a hmalakna niin October 2022 atang khan Mizoram sawrkar pawhin hma a la tan a. Command & Control Center pawh September ni 15, 2023-ah hawn a ni a. Passenger phur chi motor reng reng January ni 1, 2019 hnua lei ho chu order chhuah atanga thla 12 chhungin VLTS an vuah tur a ni a, Auto Rickshaw leh 2-wheeler Taxi te erawh chu hei hian a huam ve lo a. Mizoram-ah chuan VLTS hi Transport Department leh National Informatics Centre tangkawp chuan an buaipui a. Project pumpui man hi cheng vbc. 10.4 niin sawrkar laipui leh Mizoram sawrkar chuan 90:10 in an intum sem a. Mizoram chu hmarchhak state zinga buaipui hmasa ber a ni. 

VLTS hi Nirbhaya case tia hriat lar, kum 2012-a Delhi-a Bus chhunga pawngsualna rapthlak tak thleng vanga sawrkar laipuiin lirthei a chuang, a bikin hmeichhiate himna atana hma a lakna a ni a, Ministry of Women & Child Development pawmpuina hnuaiah Nibhaya Framework vuahin project hi kalpui a ni.