Mizoram-a a vawi khatna atan Aizawl-ah Hmeichhia VC te Inkhawmpui neih a ni

Rural Development & Administration Department (RD&AD) buatsaihin Mizorama a vawi khatna atan nimin khan Aizawl-a Vanapa Hall-ah Hmeichhia VC te Inkhawmpui, ‘State Level Convention for Women Elected Representative of Village Councils’ chu neih a ni.
Nimin a Hmeichhia VC te Inkhawmpui hi Health Minister Lalrinpuii chuan khuallian nia hmanpuiin hmanlai leh tunlai hun thlirin hmeichhiate dinhmun a that chhoh zel thuleh hun a lo inthlak danglam zel rualin ram pum thlir erawh chuan hmeichhe dinhmun hi a lo la hniam hle tih a sawi a. Hmeichhiate chawikan an nih theih nan 73rd leh 74th Amendment Act hmangin Panchayat leh tualchhung inrelbawlna ah Women Reservation 33% a awm thu leh Parliament pawhin kum 2023 khan hmeichhiate tan 33% Reservation a lo pass tawh thu sawiin, tunhnuah Mizo hmeichhiate zingah hruaitu tha leh fel tak tak thahnem tak an awm hi chhuanawm a tih zia a sawi a. Hmeichhiate dinhmun a lo that zel rual hian mawhphurhna sang tak an nei chho zel tih pawh sawiin, Village Council hmeichhe hruaitute chu mahni inring tawk leh lu zo taka an nihna hlenchhuak ngei turin a fuih a. Mipui thlantlin an nihna angin mipuite tan rinawmna nena hna thawk tur leh, tualchhung inrelbawlna kawnga a chhia leh hmaih awmte siam tha turin a chah bawk.

Rural Development & Administration Department changtu Minister Prof. Lalnilawma pawhin he hun hi khual zahawm nia hmanpuiin Mizote zingah hmeichhiate chawisan a an awm chu a lawmpui thu a sawi a. Hmeichhiate chu thawhhona ah an tangkai mai bakah an pawimawh thu a sawiin, VC hmeichhe hruaitute kalkhawm hnenah VC Fund an dawn te chu khawtlang hmasawnna a hmang turin a chah a, Own Source of Revenue pawimawhna te sawiin, a tulnaah chuan Department-in a lo puih tur thu a sawi a. Ani bakah hian Aizawl South-III Bialtu MLA Baryl Vanneihsangi leh West Tuipui Bialtu MLA Prova Chakma te pawhin thu an sawi bawk.

Local Administration Department Director Dr. Lalngura Tlau chuan he hunah hian Mizoram chhunga VC Hmeichhe hruaitute (Women Elected Representatives) 503 zet an tel thu leh hei hi an vai atanga chhutin za zela 55 a nih thu a sawi a, sawrkar hmalakna thenkhat a tarlan zingah ‘The Mizoram Village Council Act, 2025’ kan neih tawh thu leh he Dan thar hi India rama Panchayati Raj System zul zuia duan a nih thu leh Subject 22 dah a nih thu a sawi a. He hun hi RD&AD Commissioner & Secretary R. Zarzosanga chuan kaihruaiin ‘Women Friendly GP Video Clip’ chu thlirho a ni bawk.

Nimin-a he hun hman ah hian chawhnu lamah Administrative Training Institute (ATI) Director Rita Lalnunmawii Pachuau hnen atangin ‘Roles and responsibilities of WERs in local economic development & social justice’ tih thupui hmangin thusawi ngaihthlak a ni bawk.