MCAB chu a thlen chin apiangah mipuite pawhin an chhawr tangkai thu Chief Minister in a sawi

Mizoram Cooperative Apex Bank (MCAB) chuan Reserve Bank of India (RBI) hnuaia Scheduled Bank an hmuh lawmna nizan hmasa khan neiin Chief Minister Lalduhoma chuan MCAB chu a thlen chin apiangah mipuite pawhin an chhawr tangkai tih a sawi.

MCAB in Reserved Bank of India (RBI) hnuaia Scheduled Bank an nih lawmna hun Aijal Club-a an buatsaih ah hian Chief Minister Lalduhoma chuan Mizoram Cooperative Apex Bank-in RBI Scheduled Bank Status a hmuh vanga lawm ber zinga mi nia a inhriat thu sawiin, “Apex Bank hi Mizo mipuite ta liau liau a ni a, a lo pian khan a thiltum lian ber chu Mizoram mipuiten eizawnna ngelnghet an neih theih nana hmalak a ni a. Vawiin thlengin chu rilru pu chung chuan a la kal a, a thlen chin apiangah mipuite pawhin kan chhawr tangkai a ni,” a ti a. Tunah hian an CD Ratio chu 65.93 niin Mizoram-a CD ratio tha ber a nih mek thu leh ATM neih tam lamah pawh SBI dawttu ni mekin Mizo tawng ngata inziak ATM 45 an enkawl mek thu a sawi a. “Biak In sakna Loan Scheme, a bik taka duan in han nei te hi a lawmawm a. Ni tina sum leh pai dahkhawl duhte tana Pigmy Deposit Collector in han duang chhuak te hi mi retheite tana ding in nihzia tilangtu a ni,” a ti bawk.

Chief Minister chuan Bank ten sum an dawn atanga Loan an pekchhuah zat chhutna, Credit - Deposit Ratio (CD Ratio) chu sawrkar in a ngaih pawimawh thu sawiin, “RBI chuan Bank-te chu an CD Ratio 60% tal ni tura beiseiin, benchmark a siam a. Sawrkar pawhin he benchmark hi tlin vek turin kan beisei a ni,” a ti a. “Kan Bank tam takte hian thingtlang an thleng phak lova, khawpuiah chauh Branch an nei a. Heng inzarpharh tha lo Bank-te hi CD ratio nei hniam an ni tlangpui lehnghal a. Anni hi kan tangkaipui meuh em tih hi kan inzawt fo a ni,” tiin “Kan sawrkar hian kan Bank-te nena thawkho va, mi harsate khaichhuahna scheme – Hand Holding kan kalpui mek a. Kan Policy lian ber zinga mi a nih avangin kan Policy tihhlawhtlinna hmanraw pawimawh tak chu Bank te hi in ni,” tiin Thingtlang lamah inzar zau zel tur leh thingtlang mipuite rin, an ban phaka inchhawp, Mizo tawng-a dawr theih an nih chuan an tan customer rinawm tak an ni zui ngeia a rin thu a sawi bawk a. RBI Scheduled Status chuan MCAB chu dinhmun sang zawkah a hlangkai ngeia a rin thu sawiin, an kal zelna turah duhsakna a hlan nghal bawk a ni.

He hunah hian khual zahawm Cooperation Minister PC. Vanlalruata pawhin MCAB in RBI Scheduled Status a hmu chu a lawm hle tih a sawi a. “A hminga Cooperation Minister ka nih laia lo thleng a ni a, vannei pawh ka inti hle. He dinhmuna MCAB a din theih chhan hi Bank thuneitute leh thawktute thawhrimna te, Cooperation Department hmalakna vang te a ni tih ka hria a. An zaa chungah lawmthu ka sawi,” a ti.

Mizoram Cooperative Apex Bank (MCAB) hi kum 1982 khan sum lu (share capital) cheng nuai 16.53 leh thawktu mi 16 ten nen bultan a ni a. Rambuai lai a nih avangin a tir lamah hian Banking lama thiamna nei chhawr tur pawh an hmu lawk lo a. Tunah chuan MCAB hian Branch 35, ATM 45 leh thawktu 248 leh Vengtu 106 a nei tawh a. Tun Financial tawpah khan Deposit cheng vbc. 1929.53 leh Advances cheng vbc. 1272.11 a nei a, Profit cheng vbc. 40.39 hmuin a CD ratio chu 65.93 a ni a. Mizoramah a sang ber a ni a. Reserve Bank of India chuan kumin March ni 12 khan Scheduled Bank atan a rawn pawm a ni.

RBI in Scheduled Bank atana a pawm lawmna hun nizan hmasa a neih ah hian Rev. Dr. K. Lallawmzuala chuan hunserh hmangin Mizoram sawrkar-a Cooperation Department-a Commissioner Udit Prakash Rai, RBI (Mizoram) General Manager T. Lhumding leh NABARD-a DGM Bhaskar Manta te pawhin lawmpuina thu an sawi a ni.