FSL-a thawk te pawikhawihna hmun 1,841 ah kal tawh

Forensic Science Laboratory (FSL)-a mi thiamte chu kum 2000 atanga kumin April thla thleng khan pawikhawihna hmun 1,841-ah kal tawhin FSL-a thawktute hian Police-ten an man pawikhawihtu hrang hrangte kutze thla (fingerprint) 5,982 an nei/kawl tha tawh bawk.

FSL-in an chhinchhiah a tarlan a nih danin, kum 2000 atanga kumin (2026) April thla thleng khan pawi-khawihna (crime scene) hmun 1,841-ah an kal tawh a, thubuai 16,934 an enfiah zo a. Hnuchhuina kaihhnawih peng hrang hrang an hmuhchhuah zat chu 1,88,307 niin, pawikhawihna thubuai leh an endikna kaihhnawihah Court-ah vawi 5,152 an ding tawh bawk a ni.

Kum 2024-2025 chhung khan FSL mi thiam te hian tualthahna thleng vawi 20 enfiah an nei a, mipat hmeichhiatna chungchanga pawi-khawihna thleng 18 an enfiah bawk a. Heng bakah hian pawikhawihna hrang hrang enfiah an nei bawk.

FSL hian Police-ten an man pawikhawihtu hrang hrangte kutze thla (fingerprint) 5,982 an nei/kawl tha tawh a, FSL-in tun thlenga kutze thla an neihte hi pawikhawihtu convict (thiam loh chantir) tawh mi 3,373-te kutze thla leh pawikhawihtu an man tawh mi 2,609-te kutze thla a ni. 

FSL-a thawktute hi pawikhawihna hmun hrang hrangah kal kualin finfiahna awm thei angte an lakhawm thin a, pawikhawihtute manchhuahna kawngah Police kutke tangkai ber pakhat an ni.

Mizoram FSL-ah hian Director hovin Forensic Expert 14 an awm mek a. Kutze chhui (fingerprint) thiamna hmangin India ram pumah kum 2017 leh kum 2023 khan lawmman an lo la tawh a, DNA-ah a ti tha ber 2-na lawmman pawh kumin April thla khan an la bawk a ni.