FOCUS 2.0 Start-Up Mission Workshop neih a ni

Tunkar Zirtawpni thleng awh tur ‘FOCUS 2.0 Start-Up Mission Workshop’ chu nimin khan neih tan a ni a, he Project-a Component hrang hrang zirho a ni ang.

Planning & Programme Implementation Department Conference Hall-a he Workshop hi Planning & Programme Implementation Department changtu Secretary David Lalthantluanga chuan hawngin International Fund for Agricultural Development (IFAD) atangin Country Programme Analyst Piyush Kanal leh Mizoram-a FOCUS 2.0 Project Director, R. Vanrengpuia ten kalkhawmte lawmna thu sawiin project hmachhawp an sawifiah bawk a. Workshop hawnna hun hman a nih zawhah chawhma lamah Girija Srinivasan, IFAD Consultant chuan project kalhmang tlangpui – Project in a tum te, hmalak dan tur hrang hrang te, hmasawnna a thlen tura beisei te leh hmasawnna a thlen theih te a sawi a. Chawhnu lamah Isak Lalmuanpuia Chuaungo, Joint Project Director (M&E) leh IFAD Consultant ten FOCUS chungchâng presentation pe-in hun an hmang chhunzawm a ni.

FOCUS 2.0 hmalakna turah hian Department hrang hrangte nena thawhhona a pawimawh em em a. Project hi uluk taka duan niin a buatsaihna chungchangah pawh fimkhur taka ngaihtuah leh hmalak a ni a, a kalhmang leh nihphungte pawh uluk taka vawi engemaw zat ennawn leh sawiho a nih hnuah March thla khan Project Agreement tihfel a ni. He Project kalpui hun chhung hi kum ruk (6) a ni anga, District zawng zawng tuamin chhungkaw 75000 te dinhmun chawikang turin hmalakna a kalpui dawn a ni.