Computerisation of PACS hnuaiah bungrua sem

Computerisation of Primary Agricultural Credit Cooperative Societies (PACS) Phase-II hnuaia Centrally Sponsored Project kalpui mek Hardware Distribution Programme chu nimin khan Cooperation Minister PC.Vanlalruata hovin RCS Conference Hall, Babutlang-ah hman a ni.

Nimin a he hun hman ah hian Cooperation Minister PC. Vanlalruata chuan Cooperative Society chu ram hmasawnna tur atana pawimawh ber zinga mi an ni tih sawiin, Khawvel hmasawn zelin a ken tel digitaization lama hma an sawnna tur kailawn pawimawh tak a nih avangin an Hardware dawn te pawh tangkai taka hmang turin a chah a. Mizoram in hmasawnna rahbi thar a chuankai theihna atana entawntlak (model) ni tura ke pen turin a fuih a ni. Cooperation Minister chuan Society-te hmasawn zelna atan Chief Minister pawmpuina angin sawrkar laipui Ministry of Cooperation hnenah Mizoram Cooperative Policy an duan chu thehluh tawh a nih thu a sawi a. Cooperative Society-te chuan sawrkar atangin a tlem berah cheng nuai khat tal puihna an dawn theihna tur scheme a nih thu leh a hlawhtling a nih chuan Mizorama Cooperative Society-te tan a tangkai tur thu a sawi bawk.

Computerisation of PACS Project hi Ministry of Cooperation hnuaia Centrally Sponsored Project kalpui mek niin Phase-II ah hian PACS 24 Computerised tura thlan an ni a. Hardware semte hi sawrkar thuchhuah dinglai angin GeM Portal kaltlanga supplier-te hnen atanga lei an ni a. Saaj Venture, Dimapur-te chu supplier niin tun tumah hian item 10 - Desktop HP Pro Tower 280 G9, Inverter, Dot Matrix passbook printer, HP Laser printer, Thermal printer, Fingerprint Scanner, Barcode Scanner, POS machine, Webcam leh Tablet te a ni a. PACS computerized te hian ERP (Enterprise Resource Planning) software kaltlangin hna an thawk tawh dawn a ni.