Central YMA in SIR neih turah theihtawp chhuah tum

Central YMA chuan Mizoram-a Electoral Roll endikna runpui, Special Intensive Revision (SIR) neih turah khua leh tui dik tak ten an chanvo an neih ngei theihnan leh Electoral Roll dik leh rintlak neih anih theihnan theihtawp chhuah an tum thu an sawi.

Central YMA hian nizan hmasa khan Aizawl Tuikhuahtlang-a Central YMA Committee Room-ah Central YMA Executive Committee (CEC) thutkhawm neiin Election Commission of India ruahman anga Mizoram-a Electoral Roll siamthat runpui, Special Intensive Revision (SIR) neih tur chungchang hi an sawiho a. Special Intensive Revision (SIR) neih turah hian khua leh tui dik tak ten an chanvo an neih ngei theihnan leh Electoral Roll dik leh rintlak kan neih theihnan theihtawp chhuah nise an ti a ni.

Central YMA chuan Mizoram mamawh LPG phurtuten kawng lakah an lo ti chingpen thin chu ngaimawhawma an tih thu sawiin, a tul anga hmalak nise tiin Gas Agency te pawh kawm nise an ti bawk a. Mizoram-a dan lova hnamdang sumdawngte chungchangah nasa zawka hmalak nise, Branch YMA te an huamchhung theuh ah chak zawka hmala tur leh hetiang mi dap chhuak tura inngen nise an ti bawk.

CEC Meeting hian June 15-a YMA Day vawi 91-na lo thleng tur pualin India ram hmun thenkhata Mizo Welfare 19 leh Damdawi In thenkhatah Chibai bukna pek nise tiin TBCC, OKM leh TNT-ah te Buhfai pek tum bakah YMA Day pual hian TBCC-ah Health Clinic neih tum a ni bawk a. Kumin October 22-a YMA Rorel Inkhawm vawi 5-na neih turah inbuatsaihna atan mawhphurhna hrang hrangte an inruat bakah Kumin August thla chhungin Inter- Branch YMA Beat Contest buatsaih nise an ti a, September thlaah Mizo Infiamna hmanga Branch inelna buatsaih turin an lo rel tawh bawk.