Case nei Department te Case nei lo tura inbuatsaih vek turin Chief Minister in a chah

Chief Minister Lalduhoma chuan Department thenkhat ten Vigilance Case an nei nual tih sawiin, Case nei Department te chu lo tang thar a, Case nei lo tura inbuatsaih vek turin a chah.

Nimin khan Aizawl-a ATI Auditorium-ah Vigilance Department chuan Department hrang hranga Disciplinary Authority-te tan ‘Workshop for Disciplinary Authority’ buatsaihin he hun hi Chief Minister Lalduhoma chuan hmanpuiin a hawng a. He hunah hian Chief Minister chuan Workshop buatsaihtu Vigilance Department chungah lawmthu sawiin, “Vawiin-a Disciplinary Authority-te tana Workshop hi Mizorama hetiang Workshop kan neih hmasak ber niin ka hria a. He Workshop hian hnathawk tha lo leh chhawrtlak lohte chunga dan anga hmalak kawngah min tichak se, sawrkar hnathawk tha zawk nei turin min pui se kan duh a ni,” a ti a. Sawrkar hnathawktu tha, hun vawng dik, inpe zo neih an duh thu pawh sawiin, “Sawrkarna kan chan rualin chutiang hmalakna chu kan kalpui nghal a. Chhawrtlak loh te indapchhuak turin Service Review Committee din vek turin kan ti a, a tul phei chuan Special Pension pawh pek mai ni se kan ti a. A Scheme pawh kan siam a ni. Chung zawng zawng chu ram tana hna tha zawk thawh kan duh vang a ni,” a ti a. “Disciplinary Authority ten in mawhphurhna te, in hnathawh chhan leh in thawh dan turte hrechiang ula, hlawk takin hun lo hmang ang che u,” a ti bawk.

Chief Minister chuan,”Vigilance Department Quarterly Report hnuhnung ber, March 2026-a a lan danin Department thenkhatten Vigilance Case kan neih nual laiin Agriculture & Farmers Welfare, Animal Husbandry & Veterinary, Art and Culture, Environment and Forests, Law and Judicial, Tourism leh Department dang ten NIL report an nei a. An chungah lawmthu ka sawi a. Case nei Department te pawh lo tang thar a, Case nei lo tura inbuatsaih vek turin ka ngen che u a ni,” a ti. “Enquiry Officer ten thudik chauh innghahchhanah hmang thin ila, thlei bik nei lovin, tehna dik tak chauh hmang ang u. Tin, Inquiry Officer ruat kawngah pawh kan fimkhur thin dawn nia. Sawrkar chuan kan Inquiry Officer te, Presenting Officer te lawmman (honorarium) hi sawrkar laipui rate angin kan tisang a. Hei hian an hnathawh kan ngaihhlutzia a tilang a ni,” a ti bawk.

Nimin-a Workshop for Disciplinary Authority hawnna hun hi Vigilance changtu Secretary Dr. YLN Reddy IAS chuan kaihruaiin inlawmna thu a sawi a, Acting Chief Secretary & Chief Vigilance Officer Sudhir Kumar IAS chuan he hun an buatsaih chhan sawizau-a hun hmangin hemi hnu hian Disciplinary Authorities kalkhawmte hian an mawhphurhna leh hnathawh dan tur hrang hrang an zirho nghal bawk a ni.