Aizawl-ah PM Surya Ghar: Muft Bijli Yojana hman a ni

Mizoram-a ni zung chakna hman tangkai zel a nih theihna turin nimin khan PM Surya Ghar: Muft Bijli Yojana (Rooftop Solar Installation) inhriattirna leh Celebration of Solar Month chu Aizawl-a Secretariat Conference Hall No. 1-ah hman a ni a, Power & Electricity Department changtu Minister F. Rodingliana chuan a hmanpui a ni.

Nimin-a he hun hman ah hian P&E Minister chuan kan ram in a mamawh ber chu ‘Mahni Intodelhna tura hmalak’ a nih thu sawiin, chumi kawnga kan mamawh ber pakhat chu Power (kawphetha) a kan intodelh a nih thu leh India ramah tun dinhmunah Mizoram chu PM Surya Ghar-ah chuan pakhatna a ni mek chu lawmawm a tih thu a sawi a. Kan ramin leilung nghenga tharchhuah hrang hrangte dahthat leh sawngbawlna lama hmasawnna turte leh Industry lama hmasawn nan te Power hi kan mamawh thu sawiin, Mizoram in hma a sawn zel theihna turin chak takin hma an la zel a, chumi a bultan nan Mizoram-ah Solar Installation tih mek a nih chu lawmawm a ti thu a sawi bawk a. Sawrkar building 70 chuangah Rooftop Solar dah tum a nih thu sawiin, tun dinhmunah Sawrkawr building 50 velah dah mek a nih thu a sawi a. “Kan ram than nan Power hi kan mamawh a, kan ramin a tangkai taka kan hman theih chu Rooftop Solar Energy hi a ni,” a ti bawk.

Sawrkar laipui-a Ministry of Renewable Energy chuan May thla hi ‘Solar Month’ atan puangin nimin-a hun hman hi P&E Commissioner & Secretary K. Lalrinzuali chuan a kaihruai a, Mizoram chu boruak a thiang a, Solar Energy siamchhuah a remchang hle a; sawrkar laipui hmalakna angin PM Surya Ghar Scheme hnuaiah Rooftop Solar installation neih mek hi a hlawkpui tur chu Consumer/mipuite bawk kan nih a avangin mipuite hnena puangzar turin kalkhawm te a chah bawk.

P&E Department buatsaih Celebration of Solar Month-ah hian P&E Department Chief Engineer, (System Operation) Er. Laltlanthanga'n PPT hmangin PM Surya Ghar Muft Bijli Yojona chungchang tarlangin, Mizoram-a Solar Energy dinhmun report a pe bawk. P&E Department, Engineer-in- Chief Er. Ngursailova Sailo pawhin thu a sawi bawk a. He programme zawh hnu hian Secretariat Main Gate hnaih-ah vendor-te awmin, Rooftop Installation chungchang hrechiang duhte an lo pui bawk a ni.

PM Surya Ghar (Rooftop Solar) kalpui mekah hian sawrkar laipui chuan Subsidy pein 1 kWp-ah Rs. 33,000/-; 2 kWp-ah Rs. 66,000/- leh 3-10 kWp: Rs. 85,800/- te a pe a. Hei bakah hian State sawrkar chuan Subsidy pe bawkin AMC Area-ah Rs. 12,000/kWp; AMC Area atanga KM 100 chinah Rs. 14,000/kWp; KM 100 atanga KM 200-ah Rs. 16,000/kWp leh KM 200 aia hlaah Rs. 18,000/kWp a pe a, hrechiang duh tan Ph. No. 9862527932-ah zawhfiah theih a ni.