Aizawl-ah International Museum Day 2026 hman a ni

May 18-a hman thin ‘International Museum Day’ chu kumin ah pawh nimin khan hman a ni a, Mizoram State Museum pawhin khawvel hmun dangte rualin International Museum Day 2026 hi an hmang a ni.

Kumin-ah International Museum Day-ah hian thupui atan ‘Museum: Khawvel inthenhrangte inpumkhatna’ (Museum Uniting a divided world) tih a ni hman niin International Museum Day pual hian Mizoram chhunga Special School hrang hrangte chu State Museum tlawh tur hian sawm an ni a, anni bakah hian tualchhung mi leh hnam dang tlawhtu pawh an awm nual a. Aizawl College Veng-a Ephatha Special School Principal Samuel R. Lalhmangaiha chuan, naupang beng-ngawng tawng thei lo an enkawl ten hmanlai Mizo thil leh nunphung a taka a hmu thei chu a lawm-awmin a hlu hle tih a sawi a ni.

Zawhna chhangin Mizoram State Museum-a Curator C. Lalruatfela chuan, Museum chu zirna In pawimawh a ni a, hmuh theih, khawih theih leh chhiar theih a mipuite hnena zirtirna pe theitu a ni tih sawiin, hmanlai pi leh pu te leh tunlai mite min thlunzawmtu pawimawh tak a ni tih a sawi bawk a.

Mizoram State Museum-ah hian Gallery paruk - Zoology, History, Anthropology, Ethnology, Textile leh Archelogy te a awm mek a. Museum thawktute chuan, Mizo ten Museum ngaihhlut nachang an hriat zual a pawimawh a, State pawn leh ram pawn atanga Mizoram rawn tlawhtute chuan Museum chu an tlawh duh hle tih an sawi a ni.

International Museum Day hi International Council of Museums (ICOM) bultuma hman thin a ni a, International Museum Day hi a tum khatna atan kum 1977 khan ICOM bultuma hman niin kum 1992 atang khan thupui bik neiin he ni hi hman tan a ni a, he ni hmangtu ram hi pung chho ve zelin kum 2024 thleng khan khawvel ram 140 te chuan International Museum Day hi an hmang tawh a ni.