Aizawl-ah Biological Diversity Day hman a ni

International Day for Biological Diversity 2026 chu nimin May 22, 2026 khan Aizawl-a Assembly Annexe Conference Hall-ah hman a ni a, Environment Forest & Climate Change Department Minister Lalthansanga chuan a hmanpui a ni.

International Day for Biological Diversity puala hun hman ah hian Minister Lalthansanga chuan thing leh mau humhalh chungin hmasawnna kalpui thiam a pawimawh tih sawiin, Ramdang atanga thing leh mau bakah nungcha lakluh aiin a tualto humhalh a, enkawl thiam a pawimawh tih a sawi a. Nungcha leh thilnung chi hrang hrang humhalhna (biodiversity conservation) chu mipui kuta innghat a ni tih sawiin, Sawrkar hnuaia Agency te, zirchianna kalpuitu pawlte, tlawmngai pawl hrang hrang leh tualchhung mipuite chu lungrual taka thawhho reng a ngai tih a sawi bakah, thalaite chu an chakna, ngaihtuahna thar leh an tumruhna chu nungcha leh thilnung chi hrang hrang humhalh nana hmang a, sawrkar ruahmanna - policy mai ni lovin, a taka nitin nuna hmang tur leh nunpui tlat turin a chah bawk a ni.

Kumin-a International Day for Biological Diversity thupui atan hian ‘Khawvel a nghawng nei tura mahni awmhmun atanga chet lak’ (Acting Locally for Global Impact) tih chu hman a ni a, nimin-a Aizawl-a he ni puala hun hman ah hian EF&CC Principal Secretary Sudhir Kumar chuan thilnung humhalh chungchang zirtirna a pe bawk a ni.