Aizawl-ah awmpui 5000 chuang an awm nia hriat a ni

Aizawl khawpui chhungah mi In-a awm 'Awmpui' (domestic workers) mi 5000 chuang an awm a, an zinga a tam ber hi thingtlang atanga lo kal nia hriat an ni.

Centre for Development Initiatives buatsaiha awmpuite himna chungchang sawihona 'Social security scheme for domestic workers' tunhnaia neihah awmpui chungchang hi zau taka sawiho a ni a. Tun hma lam chuan Mizoram-a awmpui tam ber chu khaw chhak lam, Myanmar mi leh sa an nih thu te, chung mite chuan kum tam tak Mizoram-ah awmin kan tu leh fate an awm tlei thu leh tunhnaiah erawh awmpui mumal leh rei tak kawl a harsat tawh thute sawichhuah a ni a. Tun hma deuh chuan Mizorama awmpui tam ber hi khaw chhak lam unaute an ni a. A hnuah Tripura lam an tam hle a, tunhnai chho hian thingtlang lam leh Bru lam an tam nia hriat a ni. Awmpui hi chi hnih riah chilh ngai leh langa kal an awm a, riah chilh ho hian a tlangpuiin Rs. 6000 atanga Rs. 8000 inkar an hlawh a, langa kal hian ni khatah Rs. 250 atanga Rs. 500 inkar an hlawh tlangpui a ni.

Centre for Development Initiatives-a Field Animator Zodinpuii chuan awmpui ti duhdah tawk chu awm zeuh mahse ram dang ang chuan Mizoram-ah chuan a tam lo tih a sawi a. “Tawngkam leh engemaw hmanga hmuhsitna lam rawngkai chu awm mahse a tlangpuiin awmpui zingah tih duhdah tawk an awm tam lo hle a. Awmpui mamawhna hi a sang hle a, mahse mi nawlpui hmuhsit anih avang hian mi fel tak takin an thawk duh lo a. Tuna awmpui tam ber hi thingtlang lam leh tlema hnam hnuaihnung lam an ni ber a ni,” a ti a. An zirchianna atangin hmeichhe humsual dai leh harsatna dang tawk zingah 'awmpui' an tam tih a sawi a. “Kum 2005 atang khan domestic workers lam hi kan buaipui tan a, hmeichhe humsual dai leh harsatna tawk zingah awmpui an tam tih kan hmu a. Theihtawpa hma lain Aizawl lama awmte chu Group hrang hrang 17-ah siamin an dikna chanvo bakah an hamthatna turte kan hrilh a, tunah hian Champhai lamah hma kan la leh mek a ni,” a ti.

LESDE Secretary Dr. Lalhriatzuali Ralte chuan awmpui te chu an dikna chanvo humhalh sak an ngai tih sawiin, “Awmpui te hian ngaihsak an hlawh lo fo a, hei bakah anmahni humhimtu dan a awm lo bawk a. Hei mai bakah entleu leh tih duhdah tawk pawh an awm a, dan tha an mahni chhanhimna tur a ngai a ni,” a ti a. Domestic workers te tan Minimum Wages thar chhuah thuai tum a ni tih a sawi bawk.

Mizoram Youth Commission chuan hna zawngtu leh ruaitu inkara awlsamna a awm theih nan ruahmanna a siam a. Hemi hnuaiah hian April 24,2026 thleng khan awmpui tur bik 'maid connect' atan hian nula 59 an inziaklut tawh a, heng mite hi a ruaitu turte nen intiamkamna ziahpui an niin an zinga 7 chu hna an hmuh sak tawh a ni.