Serchhip District-a Buh thar tam chawimawi an ni

Nikum (2025)-a Serchhip District-a Buh thar tam te hnenah nimin khan chawimawina hlan an ni a, Piler khua chu a khaw mipui atanga chhuta Buh-a intodelh ber chawimawina hlan an ni bawk.

Nimin khan Serchhip-ah ‘Kisan Mela & Exhibition - 2026’ hawnna neih niin he hunah hian Serchhip District-a Agriculture Department chuan Buh thar tam te hnenah chawimawina an hlan a, Serchhip District Agriculture Officer (DAO) Lalchharliana chuan Buh thar tam chawimawina hlan tur an thlan dan sawiin, Serchhip District a khaw tin-ah chhungkaw tin Buh thar zat an lak-khawm thu leh chumi atang chuan buh thar tam hi thlanchhuah an nih thu a sawi a. Buh thar tam hi chi hnih (2)-a thlan niin Tlangram Lo atanga buh thar tam ber Lalthazuala (Piler) chuan phur 140 (quintal 29.40) tharin a dawttu Zoramchhana (Piler) chuan Phur 133 (quintal 27.93) an thar a, pathumna Zopektluanga (Hualtu) chuan phur 110 (quintal 23.10) an thar bawk a ni.

WRC (Leilet)-a buh thar tam ber Chawn-sanga (Lungpho) chuan nikum khan Buh phur 193 (quintal 34.74) tharin a dawttu Lalrotluanga (Khawlailung) chuan phur 190 (quintal 34.20) an thar a, pathumna Chawngthanpuia (Thenzawl) chuan phur 180 (quintal 32.40) an thar bawk a ni.

Serchhip District-a khaw hrang hrang ten buh an thar zat lakkhawm ah hian a khaw mipui awm zat atanga Buh-a intodelh ber chawi-mawina chu Piler khua hnenah hlan a ni bawk a, Piler khua hian nikum khan Buh phur 2843 tharin hei hi quintal 597.03 a ni a, an khaw mipui awm zat atanga chhutin thla kua (9), ni 284 ei tharchhuak anga chhut an ni bawk.

He hun hmanpuitu leh Buh-a intodelh ber chawimawina hlantu District Bawrhsap Paul L. Khuma chuan hetianga Farmers’ Award buatsaih a ni chu lawmawm a tih thu sawiin, hei hian loneitute leh kuthnathawktute tan phurna thar a siam ngei a beisei thu a sawi bawk.