Loneitute leh kuthnathawktute thawhrah chi hrang hrang phochhuahna leh hemi lama thawktu Department te hnathawh dan pholanna hun, ‘Kisan Mela & Exhibition - 2026’ chu nimin khan Serchhip Bazar chung zawl-ah neih tan a ni a, Vawiin chin chhunzawmin zawhfel a ni ang. Agricultural Technology Management Agency (ATMA) Serchhip District buatsaih hi hnih (2) awh tur ‘Kisan Mela & Exhibition - 2026’ hi Serchhip District Bawrhsap Paul L. Khuma chuan khuallian nia hawngin Kisan Mela neih a nih theih nana ATMA Serchhip District hmalakna chu fakawm a tih thu sawiin, he huna kalkhawm loneitute chu tunlai thiamna (modern technology) hmang tangkai deuh deuh tur leh mi thiamte rawn nachangte hria a, anzir chianna atanga thil tha zawk an sawite chu thuawih taka zawm thin turin a chah a. Agriculture chu mihring nunphung (quality of life) innghahna lungphum pawimawh em em, mimal leh khawtlang hriselna innghahna bulpui a nih thu sawiin, loneitute chuan thlai hrisel tak an thar theih nan rilru dik tak pu-a an hnate thawk thin tura a chah bakah he Kisan Mela hi lo hlawkpui theuh turin duhsakna a hlan a. He hun hmang tura kalkhawm Department hrang hrang hotute leh khawtlang hruaitute pawh thawhhona tha tak nei zel tur leh mahni hma chauh sial mai lova, mipuite leh mamawhtu apiangte tana thahnemngai taka thawk thin turin a fuih bawk.
‘Kisan Mela & Exhibition - 2026’ hawnna Inkhawm hi ATMA Serchhip District Project Director Lalchhuansangi chuan kaihruaiin he Mela-ah hian Department hrang 8 - Agriculture, Horticulture, Fisheries, Sericulture, AH & Vety, LRS & WC (Soil), KVK leh ATMA-te bakah Entrepreneurs/FPO-te tan Stall 24 siam a ni a. Heng Stall hrang hrangah hian hmasawnna thar an neihte leh thil siam leh tharchhuah chi hrang hrangte phochhuah niin, a mamawh apiang ten an pan theih turin ‘Animal Health Clinic’ leh ‘Plant Health Clinic’ te buatsaih a ni bawk a. FPO leh MzSRLM hnuaia SHG hrang hrangte bakah Agri-Input dealers-te an tel tha hle a, hei hian ATMA thil tum ber ‘Research-Extension-Farmer’ inthlunzawmna ti chakin, loneitu leh entrepreneur-te tan thiamna thar leh eizawnna kawng thar a hawn belh zel beisei a ni bawk. He Mela hi Vawiin chun neih chhunzawmin zawhfel a ni ang.
Comments
Post a Comment
I ngaihdan i sawi hian mipui ngaihdan i tarlang a ni!