Serchhip District-ah Chhiarpui 2027 kalpui mekin Chhungkaw tin te lo inziaklut lawk turin beisei an ni
India ram chhiarpui ‘Census’ neih tan mek chungchangah hian nimin khan Serchhip Bawrhsap, Paul L. Khuma chuan Serchhip DC Meeting Hall-ah Serchhip-a thuthar thehdarhtute kawmin an hmalak tawhna leh hmalak zel dan tur a hrilhfiah a. Bawrhsap chuan India rama Chhiarpui hi kum 1872 atang khan neih tan a nih tawh thu leh kum 10 danah neih thin niin kumin hi a vawi 18-na tur a nih thu a sawi a. Tun tuma Chhiarpui hi April 1, 2026 khan neih tan a nih thu sawiin, he chhiarpui hi a vawi khatna atan 'Digital System' hmanga kalpui a nih thu a sawi a. “In tin tlawh kuala chhiarpui hna thawktu Enumerator-te’n In tin an tlawh hunah lehkhabu kalsan tawhin, Mobile App emaw, Tablet emaw hmangin, In dinhmun leh chanchinte an ziaklut tawh dawn a ni’ a ti.
Bawrhsap chuan India rama Chhiarpui hi India Danpui hnuaia kalpui a nih thu sawiin, Census hi hlawm hnih (Phase)-a then a nih thu leh Phase-I (Houselisting & Housing Census) hi April - September 2026 chhung hian kalpui a nih tur thu bakah Phase-II (Population Enumeration) chu February 2027 atanga tan a nih tur thu a sawi a. Tun tumah hian CMMS Portal leh Census Website te hman tangkai a ni dawn a, mipuite tan April ni 15 thleng hian ‘se.census.gov.in’ ah mahni In dinhmun leh chhungkaw chanchinte ziahluh hna (Self-Enumeration) hi a tih theih dawn thu sawiin, April 8, 2026 thleng khan mi 60 vel chauh inziaklut an la awm thu a sawi a. April ni 16 atanga May ni 15 chhungin Enumerator-ten In tin tlawh kualin, data lakkhawm hna an thawh tur thu sawiin, chumi atan chuan chhungkaw tin te chu mahni In dinhmun leh chhungkaw chanchinte ziahluh hna (Self-Enumeration) hi huntiam chhunga lo ti theuh turin a chah bawk a ni.
District Bawrhsap chuan India ram Chhiarpui hi Central sawrkar hmalakna a nih thu leh Danpui anga kalpui a nih thu sawiin, chanchin dik lo petu leh thawktute ti buaitute chu Census Act 1948 Section 11-na tlawhchhanin hremna pek theih an nih thu a sawi a. Census chu ram hmasawnna (Infrastructure, School, Hospital, etc.) ruahman nana hmanraw pawimawh ber a nih thu leh Census-ah chanchin dik tawk lo kan pek chuan sawrkar Scheme hrang hrang (Ration card, Housing, Health scheme) kan dawn turah te hmaih palh emaw, mipuite’n kan hmuh tur ang hmuh loh palh emaw te a awm thei tih sawiin, hei hian mimal leh khawtlang hmasawnna a ti thuanawp thei tih a sawi bawk a. “Information kan pekte hi mipui hnena puanzar loh tur, thuruk ‘confidential’ an ni: Census-a chanchin kan pekte hi mi dang tuma hnenah a chhuak dawn lova, Court-ah pawh finfiahna atan hman phal a ni lo,” tiin Chhiarpui chu India ram-a awm zawng zawng inchhiarna tur a nih thu leh India khua leh tui ni lo te pawh chhiar tur niin he Chhiarpui-a tel avang hian ramdang mi ten India khua leh tui nihna an beisei theih loh thu pawh a sawi bawk.
Serchhip District-a Chhiarpui neih mekah hian District chhung hi hlawm 5- Serchhip (Town), Serchhip (Rural), Thenzawl (Town), East Lungdar (Rural) leh North Vanlaiphai (Town)-ah te then a ni a. Chhiarpui hna thawk tur hian Supervisor mi 31 ruatchhuah ni tawhin heng te hian Enumerator 169 te an vil dawn a. Heng Chhiarpui hna thawk turte tan hian Training pawh buatsaih ni tawhin Enumerator pakhat hian mi 700 atanga 800 vel zel an chhiar dawn a, Bawrhsap kaihhruaina hnuaia thawktu hrang hrang ten an vil reng dawn bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!