RLB Grants ruahman hmuh kim vangin VC ten lawmthu sawi

Mizoram-a Village Council te chuan khawtlang hmasawnna tur atana hnathawhna tur, 15th Finance Commission in Mizoram tana RLB Grants a ruahman zawng zawng cheng nuai 36,200 chu a hun chhungin an hmu vek thei tih sawiin, Mizoram sawrkar chungah an lawm takzet tih an sawi.

Nimin-a Aizawl Press Club-a thuhthar thehdarhtute an kawmnaah All Mizoram Village Council Association (AMVCA) President FP. Laikhama chuan 15th Finance Commission in Mizoram RLB Grants dawn tur a ruahman kum 2021 - 2026 chu a sum fai zawngin cheng nuai 36,200 a ni tih sawiin, 15th FC hnuaia RLB Grants sum dawn tawp berna tur hi 15th FC period hun chhung ngei, kumin March ni 28 khan a bo a bang awm lovin Mizoram chuan a dawng kim tih a sawi a. A bo a bang awm lova an hmuh theih nana Mizoram sawrkar hmalakna chu fakawm an tih thu sawiin, Sawrkar in a thuneihna semzai a ram hmasawnna tur a tobul ber thingtlang hmasawnna a ngai pawimawh leh party hrang hrang atanga VC-te pawh thlei bik awm lova an chanvo ang theuh hmu a hmasawnna tur sum rualkhai taka hmuh a ni chu lawmawm an ti hle tih a sawi a ni.

Hei bakah hian AMVCA President chuan kum 2011 hnua Village Council-te lawmman tihpun tur leh VC-ten sawrkar hotute dawra Aizawl an kal changa an thlenna tur hmun, VC Khualbuk an neih theih nan sawrkarin hma an lak mek avangin lawmawm an tih thu an sawi bawk.