‘Operation Jericho’ chhunzawm zel a ni tih sawi

Home Minister K. Sapdanga chuan ‘Operation Jericho’ hming vuaha ruihhlo do beihpui thlak mek chu chhunzawm zel a nih thu a sawi.

Akashvani News Aizawl a hrilh danin Home Minister K. Sapdanga chuan ‘Operation Jericho’ hi March ni 31 khan tawp rih angin lang mah se ruihhlo do beihpui hi tha thlah lova chhunzawm zel a nih thu a sawi a. State thenkhata inthlan a awm dawn avangin Mizoram Police Company paruk (6) lai Assam State Assembly inthlanna a duty turin tirh an nih thu a sawi a. Hetianga Police indaihlohna a nasat tak avang hian Champhai District-a Myanmar ramri hrula ruihhlo do beihpui thlak hna thawk tura Police dahte pawh hnuhdawh an ngaih thu a sawi a. Hetihrual hian Champhai District bakah chhim lam, Lawngtlai leh Siaha District te, Manipur ramri dep Saitual leh Khawzawl District lamah te ruihhlo tawlhrutute’n hlet an chhuah tak avangin a theih ang anga heng District-a Police tam zawk ruahman tum mek a nih thu a sawi a. A hma anga Operation Jericho hmanga ruihhlo do beihpui a siruk-la a chhunzawm leh chungchang chu sawiho chhoh mek a nih thu a sawi bawk.

April ni 1, 2026 atang khan Mizoram-ah ruihhlo tawlhruk leh dan kengkawhtute’n an man a pung hle a. Ni hnih/khat chhung lek pawhin Heroin tam tham tak man a ni a. Hemi chungchangah hian Home Minister chuan chhim lama Myanmar ramri hrul a awm District-te bakah Manipur ramri kaltlanga ruihhlo tawlhrutute an insawn tih thu an dawng niin a sawi a. Champhai District chauh ni lo, chhim lam leh Manipur ramri lamah te pawh ruihhlo lo lut tur veng tura thapui an thawh mek thu a sawi bawk a ni.