Mizoram Engineering College-ah Class tan tum mek

Lunglei Pukpui-a Mizoram Engineering College (MEC) din tur chu Mizoram Sawrkar ruahman angin kumin Academic Session, July thla hian Class tan tura hmalak mek a ni a, tunah hian a panna kawng, tui leh eng pekna te chu PWD, PHE leh P&E Department ten an buaipui mek a, chak taka hmalak a ni. He Engineering College-ah hian Civil Engineer leh Computer Engineer zirna hawn phawt a ni anga, Seat 30 ve ve hawn a ni ang. A zir turte hi JEE paltlang an nih a ngai a, a bak chu Entrance Test kalpui a ni leh anga, Mizoram Polytechnic Lunglei atanga Diploma in Civil leh Computer Science zir zo an awm chuan Entrance Test hi an ti thei ang.

MEC-ah hian Principal puitling an la awm dawn chiah loh avangin MPL Principal nilai Lalnuntluanga chu Acting Principal atan dah a ni a, thawktu dangte erawh la lak zui tur ni a sawi a ni.