Mizoram sawrkar leh HPC (D) ten Inremna an ziak dawn

Mizoram sawrkar leh Hmar People’s Convention (Democratic) te chuan Vawiin, April ni 14, 2026 hian Sakawrdai ah inremna an ziak dawn.

Home Department hotute sawi danin Mizoram sawrkar leh Lalhmingthanga Sanate kaihhruai Hmar People’s Convention (Democratic) te hian Vawiin, April ni 14 hian Sakawrdai-ah inremna an ziak dawn a, he inremna ziahna hunah hian Adviser to Chief Minister (Political) Lalmuanpuia Punte pawh a tel dawn a, he Inremna ah hian Mizoram sawrkar aiawhin Home Secretary in a hming a ziak anga, HPC (D) aiawhin an President Lalhmingthanga Sanate chuan a hming a ziak ve dawn bawk a ni.

Mizoram sawrkar leh HPC(D) inremna tura inbiakna hi tunhnaiah khan neih a ni a, hetah hian Adviser to CM Lalmuanpuia Punte leh Mizoram sawrkar bakah HPC(D) te inbia in April ni 14, 2026-ah inremna ziah an remti ta a. Thudawn danin inremna ah hian HPC (D) hian a hranpa a phut an nei lo a, amaherawhchu Sinlung Hills Council huamchhunga khaw hrang hrang inkalpawhna tha zawk neih an duh thu an sawi a, heng bakah hian HPC (D) mi leh sa te intun-nunna tur sumfai pe tura inrem niin Sawrkar laipui-a Ministry of Home Affairs nen ngaihtuah tlan tura ruahman a ni.

Sawrkar hotute sawi danin Hmar People’s Convention (Democratic) mi 43 te chu April thla chhunga an lo kir theih na turin ruahmanna siam a ni a, heng mi 43 te hian thuneitute hmaah an ralthuam an tun hunah an lo lut dawn a. Ruahman lawk dan chuan Vawiin-a Sakawrdai a inremna, ‘Memorandum of Settlement’ an ziah hnuah naktuk, April ni 15, 2026 ah Mizoram sawrkarin an awm lailawkna tur a ruahmanah an insawn ang. April ni 30, 2026-ah CTI Sesawng-ah silai tungin an ralthuamte an surrender dawn a ni.