Mizoram-ah Jute chin beihpui thlak a ni dawn

Mizoram-a Jute chin beihpui thlakna tur, Improved Cultivation and Advanced Retting Exercise atan Tlabung-ah Jute chi thlenpui a ni tawh.

Jute Corporation of India hmalakna hnuaia Jute I-Care kalpui turah hian an thawhpui Tlabung MPACS chuan an khua leh a chhehvela Jute ching tur leilet nei mi 200 chuang an ziaklut tawh a, heng mite chin tur Jute chi chu kar kalta Zirtawpni khan Tlabung-ah phurh thlen niin a chingtu turte hnenah hian a thlawna sem tur a nih thu Tlabung MPACS hruaitute chuan an sawi a ni.

Jute Corporation of India hotute chuan, Jute chu March atanga May thla bawr vel thlenga chin theih, khaw lum leh hmun uap-a chin chi a ni tih sawiin, thla 4-5 chhung vela enkawl puitlin hman a ni tih an sawi a, Jute tharchhuah chu JCI lamin quintal khat zelah Rs. 6000 vel zel Minimum Support Price an pek dawn avangin a hralhna lamah buaina a awm loh tur thu an sawi a, a thlâwna semchhuah tur Jute chi hi a man chanve chu JCI lamin tumin Lunglei District Agriculture Office-in a man chanve an tumsak ve bawk a ni.