Serchhip khawpui chhung kawng siam hna tan a ni

Mizoram sawrkar-a Public Works Department (PWD) chuan Serchhip khawpui chhung paltlangtu kawngpui siamthat hna thawk tanin Fur hmaa zawhfel hman an beisei thu Contractor te chuan an sawi.
Serchhip khawpui chhung paltlangtu National Highway-54 tih thin chu siam-that leh zauh a nih hnuah Serchhip khawpui chhung KM 10 vela thui chu National Highway hian a paltlang tawh lo a. He kawng hi hun engemaw chen enkawl mumal loha a awm hnuah PWD te kutah awm felin sawrkar in cheng vbc. 10 a dah hmangin kawngpui siam hna hi thawh a ni dawn a ni. Khawpui chhung kawngpui siam hna thawk tur hian URBAN Infra Group Private Limited te chu thlan niin anni hian Inrinni khan hna hi an thawk tan a, a bultanna atan Kikawn atanga Serchhip panna kawngpui zim laihzauh hna an thawk a ni.

He hna thawktute chuan kawngpui zauh tur hi meter 300 vela thui an neih thu sawiin, he hna bik hi ni 10 chhung vela zo hman tura an in beisei thu LENKAWL an hrilh a. Hemi hnu hian kawnpgui blacktop hna an thawh nghal tur thu leh an zawhfel theih hun tur la sawi thei lo mah se harsatna dang a awm loh chuan Fur ruahtui tlak hmaa zawhfel an inbeisei thu an sawi a ni.

PWD Serchhip Division-a hotute chuan hemi hmalam hian hriattirna tichhuakin Chhiahtlang leh Serchhip internal roads (Highway kawng hlui NH-02) chu Serchhip Division PWD hnuaiah a awm tawh thu leh Kikawn leh Sailiam inkar hi Bitumenous Concrete a kawng siam tum a nih thu an sawi a, mipuite hna a awlsam zawk nan leh kan kawng te a lo tlo zawk nan Tui Connection leh Pipe siamtha duhte tan Road Cutting Permission (Phalna) a dil theih thu leh kawng siam hi zawh a nih hnuah chuan he kawng bik atan hian Kawng siam zawh atanga thla 6 (ruk) chhungin Road Cutting Permission hi pekchhuah a nih tawh dawn loh thu te an sawi tawh bawk a ni.