Sawrkar hnathawk aikal lak chu India Danpui bawhchhiatna a nih thu Minister in House a hrilh

Department of Personnel & Administrative Reforms (DP&AR) Minister K.Sapdanga'n Sawrkar hnathawk aikal lak chu India Danpui bawhchhiatna a nih thu sawiin, sawrkar hnathawk aikal lak avanga chawlhtir mi 29 zingah Tourism Department atangin tam berin mi 18 chawlhtir an nih thu House a hrilh.

Nimin-a Assembly thutkhawma zawhna leh chhanna hunah DP&AR Minister K. Sapdanga chuan sawrkar in aikal lak tihtawp a nih theih nan nasa takin hma a lak thu leh aikal la te chu a tul anga hrem zel an niih thu a sawi a, sawrkar hnathawk aikal lak avang hian mi 37 te chungah hmalak a nih tawh thu sawiin, mi 29 chawlhtir an ni a, midang 8 te hremna tenau leh zilhauna pek an nih thu a sawi bawk. DP&AR Minister sawi danin Tourism Department atangin chawlhtir mi 18 awmin an tam ber a, Power & Electricity Department atangin chawlhtir mi 7, School Education Department atangin chawlhtir mi 2, General Administration Department leh Health & Family Welfare Department atangin chawlhtir mi pakhat ve ve bakah Higher and Technical Education Department atangin hremna tenau leh zilh hauna pek mi 8 an awm thu House a hrilh a ni. 

Tourism Department atanga chawlhtir mi 18 te hi Asst. Receptionist (P.E) pahnih leh IV Grade (P.E) sawmparuk niin P&E Department atanga chawlhtir mi 7 te chu Electrical Worker paruk leh Group D pakhat an ni a, School Education Department atanga chawlhtir mi 2 te chu MR Teacher ve ve an ni a, Health Department leh GAD atanga chawlhtir te chu Group D (PE) pakhat ve ve an ni a, Higher & Technical Education Department atanga hremna tenau leh zilhhauna pek mi 8 te chu Govt. Kolasib College-a thawk Assistant Professor te an ni.

DP&AR Minister K. Sapdanga chuan sawrkar hna tam zawk chu Confidential-a vawn chi a nih avangin sawrkar hnathawkte chauh thawh tur a nih thu leh aikal te chu sawrkar hnathawk an nih loh avangin aikal lak chuan India Danpui a bawhchhia tih a sawi a. Hei bakah hian aikal lak chuan zik tluak taka sawrkar hna zawngte hmakhua a dip dal avangin Natural Law a bawhchhia bawk, a ti a. Sawrkar chuan tun thlengin aikal lak dan siam tumna a la nei lova, aikal mamawh, hnathawk tha thei tawhlo te tan‘Mizoram Special Voluntary Retirement Scheme 2024’ siam a nih thu House a hrilh bawk.