Saitual-ah Tung chi semchhuah a ni

Nimin khan Saitual-ah Tung chi sem niin he hun hi Bawrhsap Srinivas Sadi chuan khualian nia hmanpuiin Tung chi hi a sem a ni.

Saitual DAO Office-a Tung chi semna hunah hian Bawrhsap chuan Tung chu Saitual District-a a awm hnuah chiah a hriat thu sawiin, August ni 4, 2024-a din Saitual District Tung Grower Association chu Association la naupang tak ni chunga hma tha taka an la thei chu fakawm a tih thu a sawi a. Tung chingtute chu DAO kaltlangin an harsatna leh mamawhna te thlen thin turin a chah a, sawrkar lam atangin pui tura an inhawn reng thu a sawi bawk.

October ni 8, 2022 khan Saitual Tung Grower Association din a ni a, April ni 29, 2023 khan RZ Foundation kaltlangin Galaxy surfactant limited Mumbai te nen kum 3 atan inremna ziah a ni. District chhunga khaw dangte huap zau zawk turin Saitual District Tung Grower Association chu August ni 4, 2024 khan din a ni. Tung hriak hi bungrua (furniture) tih tletna atan te, varnish, paints leh leather tih tletna atan te leh thil dang hrang hrangah an hmang nasa hle a, chin a nih atanga kum 3 bawr velah an rah tan thei a, kum 30 bawr vel thleng an rah thei a ni.