Ran suat te zangnadawmna tur sum dawn a ni tawh

Animal Husbandry & Veterinary Minister C. Lalsawivunga chuan hri leng avanga ran suat te zangnadawmna pek tur chu a thawh khatna leh thawh hnihna ah cheng nuai 66.49 ve ve hmuh a nih tawh thu a sawi. Nimin-a Mizoram Legislative Assembly thutkhawmah AH&Vety Minister C. Lalsawivunga chuan ranvulhtu ten insurance an tih theih dan tur kimchang sawiin, document tul leh pawimawh te an neih hnuah District tina NIC Staff-te hnenah thehluh tur a nih thu a sawi a, Insurance dil theihna ranvulh te chu - Bawng, Sial, Vawk, Kel leh Beram te a ni tih a sawi. Hei bakah hian AH & Vety Minister chuan hri leng avanga ran suatte zangnadawmna chungchang ah a thawh khatna leh thawh hnihna ah cheng nuai 66 vel ve ve hmuh a nih thu sawiin, thawh thumna leh thawh lina pawh tunah hian beisei mek a nih thu a sawi a, sawrkar kum hmasaa zangnadawmna chu sawrkar kum tharah zel pek a nih thu a sawi bawk.