Mizo Diaspora Cell-in hma an la mek zel tih an sawi

Mizoram Chief Minister’s Office hnuaia din Mizo Diaspora Cell (MDC) chuan khawvel hmun hrang hranga Mizo chengte inpawhtawn theihna tur leh tanpui an ngaih huna pui turin hma a la mek zel.

Mizo Diaspora Cell hian a din tirh atanga tun thleng hian ramchhung leh pawna buaina tawk, an hnena puihna dila thlen case thahnem tak a awm tawh tih MDC hotute chuan an sawi a; Heng zingah hian China, Malaysia, Dubai leh a dangte-a documents mumal nei lova kal leh tangkhang ta te MDC-in a buaipui chu hlawhtling taka hruai haw an ni tawh tih sawiin, a bak la buaipui chhunzawm mek an neih thu an sawi bawk. Ram danga buaina tawk thahnem tak te chu MDC kaltlang hian chinfel sak an ni tawh a, Official Channel hmanga buaipui an nih thin piah lamah Phone Call kaltlangin thuneitute an dawr kual nasa thin tih an sawi a, ramchhung State dang leh ram pawna Mizo Officer awm te chu hemi kawngah hian an tangkai em em thin tih an sawi bawk.

Ram pawna case langsar zualte chu Dubai, Maldives, Nepal, China, Malaysia-ah te a nih thu pawh MDC chuan sawiin, tam tak chu passport lem hmanga Myanmar kaltlanga ram danga dan lova hna thawka kalte an ni tih an sawi a, MDC hian ram pawna buaina tawkte tanpui turin Ministry of External Affairs kaltlangin hma a la thin a; ram chhunga buaina tawkte pawh an awmna hmun Local Authorities-te leh Mizo Association-te kaltlangin, Home Department leh SP (CID) te nen thawkhoin Ministry of External Affairs-ah thlen thin tih an sawi a ni.