Paite Hnam huphurh vang nia an hriat thu an sawi

Paite Students Welfare Association (Siamsinpawlpi) Hqrs. chuan Sialkal Range Development Council (SRDC) Bill sawihona chungchang ah Opposition-te duhdan anga ngaih theih tura thutlukna a awm ta hlauh leh chumi atana hmalakna a awm chu an nihna ai maha Paite hnam dahsanna leh huphurhna vang nia an hriat thu an sawi.

Nimin-a thuchhuah an siamah Paite Students Welfare Association chuan Sialkal Range Development Council (SRDC) chu Paite Hnam bil ta a nih loh thu leh Paite hnamte hmalaknaa din pawh a nih loh thu sawiin, “Sawrkarin Sialkal tlang-a cheng, khawsakna kawnga hnufual zawkten midang nena hmasawnna kawnga midangte ruala ke an pen ve theih nana a din a ni a, a huamchhunga chengte hi Paite an lo ni mai zawk a ni,” an ti a. “Hetihlai hian kan Legislative Assembly Member thenkhat chuan thisen chhuak leh nunna chan em pawh awm lo va SRDC Act neih hi awm leh dik lova hriain he Bill hi an hnial a ni,” an ti a. SRDC Bill hi Council thar siamna tur ni lovin sawrkar Notification awm mek Act-a thlakna tur mai nia an hriat thu pawh sawiin, “Hemi thlak nana thisen leh nunna hlan ngai tur a ngaih tlat hi pawi kan ti a; chu ai mah chuan Paite-ho hi tharum nena che a, Mizoram tibuai tura fuihpawrh nana rorelna Insang meuh hman a ni hi a pawi mai ni lovin a zia lo kan ti hle. Law and order tihbuai tuma Legislative Assembly hman bawrhban tumna te pawh a ang deuhin kan hria a ni. Paite hi chuan tharum thawhna hi engtiklai mahin tha kan ti ngai lo a ni,” an ti bawk.

He an thuchhuah ah hian Mizoram-ah hian Mizo Hnam hrang hrang ten mahni puala inrelbawlna neih theih nia ngaiiin 1947-48 lai khan Paite Federation chuan Regional Council a lo dil tawh thu leh kum 1964-ah Paite National Council (PNC)-in a dil ve leh thu an sawi a. “Khatih laia Mizo District Deputy Commissioner K. Saigal pawhin a huamchin tur enin Sialkaltlang dung hi a tlawh nghe nghe a ni. Mahse, Mizo National Front (MNF) movement-in a rawn nangching a, Paite tam tak pawhin he Movement an zawm ve a. Chutih laiin, PNC hruaitu thenkhat thah an ni a, a then chu man an nih hnuah Mizoram-ah awm ngam loin an tlanchhia a, Regional Council dilna pawh a zuzi ta a ni,” an ti.

Mizoram buai a reh hnuah hnam bil inrelbawlna neih ve duhna boruak a lo thar ve leh tih pawh sawiin, “Paite zingah Hmar People Convention (HPC) Movement kut tuarte an lo awm tan bawk avangin PNC chu tharthawh leh a ni a, Sixth Schedule hnuaia Autonomous District Council an ngen a ni. Chuvangin SRDC hi Paite ta bil ni hran lo mah se Paite-in Autonomy nei tura hma la lo emaw, tawrh pawh tuar miah lo ang a ngaih hi chu a dik lo a ni,” an ti a. “Tharum thawhna phut leh beisei ang hrima Legislative Assembly meuha sawi a ni hi keini Paite zirlaite chuan a tha lo kan tiin Mizoram ralmuanna hi tihderthawnin awm lo se kan ti hle a ni,” an ti bawk.