Kawng siam mek enfiah leh

Central YMA Road Monitoring Committee chuan nimin khan Sairang leh Vairengte inkar National Highway kawngpui siam that mek endikin Hnathawktu Contractor hrang hrangte hmasawn dan chu tha thawkhatah an ngai a; tan lak nasat zual ngai Contractor, J. Infratech Limited chu hna-thawktu tam zâwk lak belh tur leh huntiam chhunga hna thawk zo hman ngei tûrin an hrilh bawk.

Central YMA Road Monitoring Committee chuan Sairang Zero Point atanga Buichali Bridge inkâr te, New Khamrang atanga Kawnpui leh Kolasib atanga Bilkhawthlir kawng te siamtu Contractor, J. Infratech Limited ten hna thawh zawh hun tura an intiam hun April ni 30-a an hna an thawh zawh vek hman loh an hlauh thu an sawi a. A chak thei ang bera thawk chhunzawm zêl tûr leh hnathawktu pawh a tam thei ang ber lâk belh turin an hrilh a ni.

Sairang leh Vairengte kawngpui siam hna kal mekah hian Buichali Lei atanga New Khamrang inkar thawktu Contractor, BRC Company te chuan tun March thla chhung hian thawh zawh vek hman an tum thu Central YMA hruaitute hi an hrilh a. Kawnpui leh Kolasib leh Bilkhawthlir leh Vai-rengte inkâr kawng siamtu Contractor, Balaji Constructions Company te chuan hna an thawk zo thawkhat tawh tih an hmu a ni.

Kawng siamtu Contractor-te hian an har-satna tawh hrang hrangte leh puih an ngaihnate Central YMA hruaitute hnênah an lo thlen bawk a. Duh anga hna an thawh chak tawk theih lohna chhan an sawi pakhat, kawng siam endiktu an tam lutuk leh endiktu hrang hrang an rawn kal apianga Contractor lama a hmuna thutchiltu zingah a hotu lu ber ten tawiawm zêl a ngaih thin avanga an nitin hna thawhin a tawrh phah thu an sawi a, endiktu hrang hrang ten hnathawh hmasak tur chungchang ah duh dan hrang an neih thin avanga Contractor ten harsatna an tawh thu an sawi bawk a. Rua-hmanna an siam lawk anga hna thawhtir theih nise an duh thu YMA chuan an sawi bawk.