IWRD Minister hovin hmang

Khawvel puma lui humhalh ni atana hman, International Day of Action for Rivers chu Inrinni, March 14, 2026 khan hman leh niin he ni puala IWRD Auditorium-a hun hman chu Irrigation & Water Resources Department changtu Minister PC. Vanlalruata chuan hmanpuiin tui pawimawh zia leh lui tui humhalh that loh in mipuite a nghawng nasat turzia sawiin, Mizoram-ah lui tui fim a awm avanga Mizo mipuite kan vanneih zia a sawi a. Lui lian tha a awm loh avangin tui hna siamtu lui te zawkte humhalh a ngaih thu sawiin, lui tui chu nunna hnar a nih thu leh humhalh a nih loh chuan thangthar lo awm zel turte’n tui in tur an nei dawn loh thu te a sawi bawk.

International Day of Action for Rivers hi kum 1997 khan Brazil-a ram hrang hrangte intawhkhawmnaah lui humhalh a nih theih nana kum tina hman tura rel niin, March ni 14, 1998 atanga kumin thlengin khawvel puma hman a lo ni ta a. Mizoram-ah pawh nikum, kum 2025 atang khan hman niin kumin hian ‘Protect Rivers, Protect People’ (Kan dam khawchhuah nan lui humhalh rawh) tih chu thupui atan hman a ni.