Serchhip-ah Chapchar Kut 2026 ropui takin hman a ni
Serchhip-a Chapchar Kut 2026-ah hian Rural Development Minister Prof Lalnilawma chu Kut Pa niin Mizote Kut zinga ropui ber Chapchar Kut hmang tura kalkhawmte chibai bukin hlim taka hmang turin duhsakna a hlan a. Chapchar Kut hi Zo nun ze mai chawisanna a nih bakah Mizo Culture, Mizo thuam, Hnam Lam leh Zai te chawinunna hun remchang a nih thu a sawi a. Kumin Chapchar Kut Thupui ‘Zo Nun Ze Mawi - Inremna’ chu a sawia sawi aiin a taka nunpui tur a ni, tiin Ram leh khawtlang hmasawnna tura hma an laknaah pawl hrang hrang te inrem tur te, Policy hrang mahse Political party te pawh inrem tur leh Doctrine in ang lo nei Kohhran hrang hrang te pawh inrem turin a sawm a. Serchhip chu ziak leh chhiar thiam tamna District an nih angin zirna uar turin a sawm bawk a ni.
He hunah hian Kut Thlengtu, District Bawrhsap Paul L. Khuma chuan kumin Chapchar Kut thupui ‘Zo Nun Ze Mawi - Inremna’ a nih ang ngeiin huatna aiah hmangaihna, rinhlelhna aiah rinna, manganna aia beiseina, thinrimna aiah lungawina, thim aiah eng, innghirnghona aiah inremna kan zavaia kan neih theih nan an rilru te buatsaih turin a fuih a. Hlim taka Chapchar Kut hmang turin kalkhawmte a sawm bawk a ni.
Serchhip-a Chapchar Kut hi Hun hnih-ah then niin hun hmasa lamah Chapchar Kut Working Chairman leh Addl. DC, Lalrinzuala kaihhruaiin hun hman a ni a, Serchhip Town Branch YMA ten Cheraw Kanpui an entir a. Sub-Hqrs. YMA Cultural Troupe, Govt. Serchhip College Phun-chawng Cultural Club, MHIP Sub-Headquarters leh YMA Chhang ten Hnam lam chi hrang hrang mawi tak tak an entir a. Mal zai leh Zaipawl zai ngaihthlak tur a awm bakah Govt Serchhip College ten Mizo hnam inthuamin Fashion Show leh lemchan tawi hmuhnawm tak an entir a. Chapchar Kut chhimtu zawng zawng te hlim takin an Chai ho bawk a. Miss Chapchar Kut 2026 atan Lalhlupuii Chhangte, Serchhip Kawnpui North chu thlan niin hun hnihnaah hian Concert neih chhunzawm a ni a. Aizawl atanga Zaithiam lo kal bakah Serchhip MZI leh MDM member zaithiam tak tak ten mipui kalkhawmte an awi a ni.
Nimin-a Serchhip-a Chapchar Kut hman ah hian Mizo Thang chi hrang hrang 14 - Thang-thleng, Thangpui, Vaithang, Beai, Khaileng, Sahdal, Thangchep, Kar, Fal, Mangkhawng, Hnawhtawt, Kawlper, Vawm tlak leh Aiawt te chu mipuite entheih turin pho chhuah a ni a. Mual sirah Commerce & Industries Department buatsaihin Stall chi hrang hrang 10 hawn a ni bawk a. CM Special Package dawngtu 3, PMVK beneficiary pakhat bakah khawtual mi thiam-hnang deh lam thiam 6 ten mipuite lei theih turin dawr an hawng bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!