Gas buk tling lo sem thin Official a report awm lo

Food, Civil Supplies & Consumer Affairs Department changtu Minister B. Lalchhanzova chuan LPG Distributor-ten Gas bur buk tlinglo an sem thin tih Official taka report dawn an neih loh thu a sawi.

Assembly Session neih mekah MNF Member Rasik Mohan Chakma chuan ‘LPG Distributor-ten Gas bur buk tlinglo an sem thin hi Department beng a thleng tawh em?’ tih a zawhna chhangin Supply Minister B. Lalchhanzova chuan Social Media leh thu leng vel atang chuan an hriat thin thu leh mimal atang emaw-a ziak leh Official tak chuan report dawn ala neih loh thu a sawi a. “Report mumal tak dawn ni lo mahse Inspector ten Gas trip lo thleng hi an lo check thin. Distributor-ten an Godown-a an unload dawn hian an buk vek a, a buk tling lo chu an thawnlet leh thin avangin an Godown a awm hi chu buk tling vek tura ngaih a ni,” a ti.

Supply Minister chuan LPG Distributor te Godown chu endik thin a nih thu pawh zawhna chhanga tarlangin, LPG distributor-te semchhuah emaw, Home Delivery-te chu bukna (weighing quipment) hmanga buk thlap tur a nih thu pawh a tarlang a. Dan bawhchhia te hremna chungchang zawhna pawh chhangin, “LPG Distributor-te hi Company hnuaia sumdawng an nih angin dan an bawhchhiata hrem theitu chu Company-te an ni a, State Sawrkar-in order zawm tha duh lo a hrem ve theih dan chu State chhunga sumdawng an nih angin an sumdawn phalna Trade License tihtawp (cancel) sak hi a hrem theih dan sang ber a ni,” a ti bawk.

Hei bakah hian Supply Minister chuan Mualkhang-a Gas Bottling Plant pawh chhunzawm zel a nih thu sawiin, hemi atan hian cheng vbc. 225.71 approve sak an nih thu leh a ram lei nan an sawrkar hnuah cheng nuai 27 an pek tawh thu a sawi bawk.