College hrang hranga UGC phut tling lo Zirtirtute tun thla chhung bak rawih chhunzawm an ni dawn lo

Higher & Technical Education Minister Dr. Vanlalthlana chuan College hrang hranga UGC-in a phut anga tling lo Zirtirtute chu tun thla bak rawih chhunzawm an nih tawh dawn loh thu nimin khan Assembly House-ah a sawi a. RUSA hnuaia Zirtirtu lakte ngheh theihna tur an ngaihtuah thu a sawi bawk.

Nimin-a Mizoram Legislative Assembly thutkhawm zawhna leh chhanna hunah ‘Unqualified Teacher-te ban tir mai lova an qualify theih nan chance pek an ni em?’ tih zawhna chungchangah Higher & Technical Education Minister Dr. Vanlalthlana chuan, University Grant Commission (UGC)-in National Eligibily Test (NET) a phut ang nei lo te chu chhawr chhunzawm an nih tawh dawn lo a, hreh tak chungin an mahni rawih chhunzawmna tur hi March thla atang chuan a tawp ta a ni, a ti a. Unqualified Teacher te chu dan anga an qualify theih nan chance pek thin an nih thu sawiin, heng Unqualified Teacher-te hi dem ngawt theih an nih loh thu a sawi a, hnaa lak an nih dawna Advertisement-ah NET phut tel a nih loh thu leh a hnuah sawrkarin NET nei turin a tih leh thu a sawi a ni.

MPSC-in kum 2019-a RUSA hnuaia Zirtirtu a lakte chu kum 2 an thawh tlin tawh chuan CSS hnuaia mi an nih tawh loh thu leh kum 2 hnuah chuan an hlawh hi State sawrkarin a pek vek tawh thu Dr. Vanlalthlana chuan a sawi a; sawrkarin ‘Kum 2 hnuah a liability an tum ang’ tiin a lo intiam tawh a, ZPM sawrkar chuan an nghehna tur ngaihtuahin, Council of Minister in a ngaihtuah tawh a, thil nghah hlek ngai, ngaihven ngai thil ala awm a, ngaihven a nih zawhah chuan an chungchang hi chu a rawn chhuak thuai anga, an ngheh theihna tur ngaihtuah a ni, a ti bawk.

Higher & Technical Education Minister Dr. Vanlalthlana chuan Tuialhthei atanga Mizoram sawrkar in chhiah a lak, Social Infrastructure & Service Cess atangin Higher & Technical Education Department in cheng nuai 150 an dawng tawh tih sawiin, heng sum te hi College hrang hrang tih hmasawn nan hman a nih thu leh a bik takin Aizawl leh Lunglei Polytechnic te chu sum pek tam deuh bik an nih thu te a sawi bawk.

Minister Dr. Vanlalthlana chuan College Principal la fel tura hmalak mek a nih thu sawiin, kum 2019-a MPSC-in RUSA hnuaia College Zirtirtu a lakte chu dah ngheh tum an nih thu a sawi bawk.