A vawi khat nan ‘Lemchan – Mizoram Film Festival’ nei

Zonuna Kawlni /

Mizoram-a a vawi khatna atan ni thum (3) chhung awh tur ‘Lemchan – Mizoram Film Festival 2026’ chu nimin khan Aizawl Treasury Square-a I&PR Office-ah neih tan a ni.

Ministry of Information & Broadcasting, National Film Development Corporation leh Directorate of Information & Public Relations, Govt. of Mizoram tangkawp in an buatsaih ‘Lemchan – Mizoram Film Festival 2026’ hawnna hi I&PR Minister B. Lalchhanzova chuan hmanpuiin Mizoram-ah a tum khatna atana hetiang hun buatsaih a ni chu lawmawm a tih thu a sawi a. Mizoram-in mi thiam leh creative tak tak kan ngah thu sawiin,  Film Festival chu Mizo filmmaker-te tan an thiamna pholanna leh khawvel hmaa Mizo thawnthute phochhuahna hmun pawimawh tak a nih thu a tarlang a. Film siam lamah ram dangte nen thawhhona tha neih a duh thu a sawi bawk.

He hunah hian IPRP&S Secretary Betsy Zothanpari Sailo chuan inlawmna thu sawiin, he Festival buatsaih tura I&PR Directorate hmalakna chu fakawm a tih thu a sawi a. India hmun hrang hrang atanga film lama mi thiam sawm bikte hnenah an hun hlu tak senga he Festival an rawn chhim theih avangin lawmthu a sawi a. Festival chhim tura sawm, Bollywood film engemaw zata chang tawh, Lilette Dubey-a pawhin festival hawnna hunah hian Mizoram Film Festival chhim tura sawm a ni chu lawmawm a tih thu a sawi a. Lemchan leh rimawi hi kum tam tak ral hnu pawha an hlutna hloh lo an nih thu leh hnam hrang hrang leh tawng hrang hrang hmangtute thlun awmtu pawimawh tak a nih thu a sawi bawk.

Lemchan – Mizoram Film Festival hi Aizawl-a I&PR Office-ah February 16-18, 2026 chhung neih tur a ni a. Ni thum chhung hian film lama mi thiamte hnen atangin zirtirna hrang hrang neih a ni dawn a, State hrang hrang film thlan bikte leh Mizo film-te chhuah (screening) a ni dawn bawk a. India ram State hrang hrang atangin film siam lama mithiam engemaw zat sawm an ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »